Псальмаў 51 Псальм 51 (50)

¹ Кіраўніку хору. Псальм. Давідаў.

² Калі прыбыў да яго прарок Натан, пасля таго як учыніў ён грэх з Бэтсэбай.

³ Злітуйся нада мною, Божа, паводле міласэрнасці Тваёй; і паводле мноства літасцівасці Тваёй зруйнуй правіннасць маю.

⁴ Яшчэ больш абмый мяне ад правіннасці маёй і ад граху майго ачысці мяне.

⁵ Бо я прызнаю правіннасць маю, і грэх мой заўсёды перада мною.

⁶ Перад Табой, перад Табой адзіным зграшыў я і тое, што ліхім ёсць перад Табою, дапусціў я. Ты справядлівы у прысудзе Тваім і пераможаш на судзе Тваім.

⁷ Вось жа нарадзіўся я ў правіннасці, і ў граху пачала мяне маці мая.

⁸ Вось жа палюбіў Ты праўду ў сэрцы і патаемна адкрыў Ты мне мудрасць.

⁹ Пакрапі мяне гізопам — і стану чыстым, памый мяне — і стану бялейшы за снег.

¹⁰ Дай мне пачуць пацеху і весялосць, і ўзрадуюцца косці, якія Ты паламаў.

¹¹ Адвярні аблічча Тваё ад грахоў маіх, і зруйнуй усе мае правіннасці.

¹² Сэрца чыстае ствары ўва мне, Божа, і моцны дух аднаві ва ўлонні маім.

¹³ Не адганяй мяне ад Твайго аблічча і Духа Святога Твайго не адбірай у мяне.

¹⁴ Вярні мне пацеху збаўлення Твайго і самым руплівым духам узмацуй мяне.

¹⁵ Буду вучыць я збачэнцаў з Тваіх дарог, і тады бязбожнікі вернуцца да Цябе.

¹⁶ Вызваль мяне ад [віны пралітай] крыві, Божа, Божа збаўлення майго. Хай славіць радасна язык мой справядлівасць Тваю.

¹⁷ Госпадзе, адчыні вусны мае, і вусны мае стануць апавяшчаць Тваю хвалу.

¹⁸ Але ж не пацяшае Цябе ахвяра, цэласпаленне, калі прынясу яго, Табе не спадабаецца.

¹⁹ Ахвяра Богу — дух спакутаваны; сэрца стурбаванага і пакорлівага, Божа, Ты не адцураешся.

²⁰ Будзь спагадлівым, Госпадзе, у Сваёй добразычлівасці да Сіёна, каб збудаваліся муры Ерузаліма.

²¹ Тады прымеш Ты ахвяру справядлівасці, прынашэнні і цэласпаленні; тады буду складаць на ахвяру Табе цялят.