Псальмаў 72 Псальм 72 (71)

¹ Пра Саламона. Давідаў. Божа, суд Твой перадай цару і справядлівасць Тваю сыну царскаму.

² Хай валадарыць па справядлівасці над народам Тваім, а над убогімі Тваімі па законе.

³ Хай горы прынясуць мір для народа, а ўзгоркі — справядлівасць.

⁴ Ён судзіць будзе жабракоў народа і збавіць сыноў убогага і ўпакорыць паклёпніка.

⁵ Будзе жыць ён разам з сонцам і пакуль свеціць месяц у пакаленні і пакаленні.

⁶ Сыдзе ён, быццам дождж на траву і быццам залева, што абвадняе зямлю.

⁷ У днях яго зацвіце справядлівасць і паўната спакою, пакуль не пагасне месяц.

⁸ будзе валадарыць ад мора аж да мора і ад ракі аж да ўскрайкаў сусвету.

⁹ Перад ім будуць падаць жыхары пустыні, і непрыяцелі яго лізаць будуць зямлю.

¹⁰ Цары Тарсіса і вострава прынясуць дары, цары Арабаў і Сабы дашлюць яму падарункі.

¹¹ І паклоняцца яму ўсе цары, і ўсе народы служыць яму будуць.

¹² Бо ён вызваліць убогага, які прызывае яго, і беднага, у якога не было ўспаможцы.

¹³ Пашкадуе ён беднага і ўбогага, і душы бедных ён уратуе.

¹⁴ Уратуе ён душы іх ад прыгнёту і гвалту, і кроў іх дарагая будзе для яго.

¹⁵ Дык будзе жыць ён, і дадуць яму ад золата Арабіі, і будуць маліцца за яго заўсёды; цэлы дзень дабраслаўляць будуць яго.

¹⁶ І будзе дастатак хлеба на зямлі, закалышацца ён на вяршынях гор; быццам Лібан, плод яго, і расквітнее [насельніцтва] гарадоў, быццам трава зямлі.

¹⁷ Хай будзе дабраславёна імя яго вечна, пакуль [свеціць] сонца, будзе жыць імя яго. І будуць дабраславёныя ў ім усе пакаленні зямныя, усе народы ўзвялічаць яго.

¹⁸ Дабраславёны Госпад Бог, Бог Ізраэля, Які сам адзін творыць цуды.

¹⁹ І дабраславёнае імя велічнасці Яго навечна; і напоўніцца велічнасцю Яго ўся зямля. Хай будзе так, хай будзе!

²⁰ Скончыліся малітвы Давіда, сына Ясэева.