Псалтыр 98 псалом
Псалтыр
Пераклад Чарняўскага 2017 → Пераклад Яна Станкевіча
Псальм. Спявайце Госпаду новую песню, бо ўчыніў Ён цуды. Паратунак у правіцы Яго і ў руцэ святой Яго.
Псальма. Пейце СПАДАРУ новую песьню, бо чудосы ўчыніў Ён. Памагла Яму правіца Ягоная й сьвятое плячо Ягонае.
Госпад абвясціў Сваё збаўленне, на віду паганаў аб’явіў Ён Сваю справядлівасць.
Ведамым зрабіў СПАДАР спасеньне Свае, перад ачыма народаў Ён аб’явіў справядлівасьць Сваю.
Успомніў Ён пра міласэрнасць Сваю і пра праўду Сваю для дома Ізраэля. Убачаць усе канцы свету збаўленне Бога нашага.
Успомнеў Ён ласку Сваю а вернасьць Сваю да дому Ізраелявага. Абачылі ўсі канцы зямлі спасеньне Бога нашага.
Услаўляй гучна Бога, уся зямля, выбягайце, радуйцеся і грайце псальмы.
Весела гукайце СПАДАРУ, уся зямля, завядзіце, пейце а грайце.
Грайце Госпаду на цытры, на цытры і з гукамі псальма.
Грайце СПАДАРУ на гарпе, на гарпе і голасам песьні;
На срэбных трубах і пад гукі рога спявайце гучна славу перад абліччам Госпада Валадара.
На трубах і з гукам рогу весела гукайце перад Каралём СПАДАРОМ.
Хай шуміць мора і ўсё, што яго запаўняе, увесь сусвет і тыя, што ў ім пражываюць.
Няхай мора гудзіць і паўніня яго, сьвет і жывучыя ў ім;
Хай рэкі плешчуць у далоні і разам радуюцца горы
Няхай цур’і б’юць уладкі; хай горы разам вяселяцца
перад Госпадам, бо прыходзіць Ён судзіць зямлю. Ён будзе судзіць сусвет па справядлівасці і народы — па праўдзе.
Перад відам СПАДАРОВЫМ, бо Ён прыходзе судзіць зямлю; будзе судзіць сьвет у справядлівасьці і люды ў пасьцівасьці.
