Псалтыр 25 псалом

Псалтыр
Пераклад Чарняўскага 2017 → Пераклад Яна Станкевіча

 
 

АЛЕФ. Давідаў. Да Цябе, Госпадзе, узняў я душу маю.
 
Давідава. Да Цябе, СПАДАРУ ўзьнімаю душу сваю.

БЭТ. Божа мой, на Цябе спадзяюся; хай не сумеюся! Хай не кпяць з мяне непрыяцелі мае.
 
Божа мой! на Цябе я спадзяюся, няхай ня буду засаромлены, няхай непрыяцелі мае не захапляюцца з радасьці зь мяне.

ГІМЭЛЬ. Бо ўсе тыя, што трымаюцца Цябе, не будуць засаромлены. Засаромлены будуць тыя, што чыняць бязвер’е дзеля марнасці.
 
І ўсі, што спадзяюцца на Цябе, ня будуць засаромлены; будуць засаромленыя тыя, што бяз прычыны ізрадныя.

ДАЛЕТ. Пакажы мне, Госпадзе, Свае дарогі і навучы мяне Сваім сцежкам.
 
Дарогі Свае, СПАДАРУ, азнаймі імне; сьцежкаў Сваіх наўчы мяне.

ГЭ. Вядзі мяне праўдай Тваёй і вучы мяне, бо Ты Бог збавення майго. ВАЎ. На Цябе спадзяюся штодня.
 
Вядзі мяне ў праўдзе Сваёй і наўчы мяне; бо Ты Бог спасеньня майго, на Цябе я спадзяюся ўвесь дзень.

ДЗАЙН. Помні, Госпадзе, пра міласці Твае і пра міласэрнасць Тваю, бо яны спрадвечныя!
 
Памятуй міласэрдзе Свае, СПАДАРУ, і ласку Сваю, бо спрадвеку яны.

ГЭТ. Не прыпамінай грахоў маладосці маёй і злачынстваў маіх, але помні пра мяне Ты паводле міласэрнасці Тваёй, згодна дабраце Тваёй, Госпадзе.
 
Грахоў маладосьці мае і выступаў маіх не ўспамінай; подле міласэрдзя Свайго ўспомні мяне Ты, дзеля дабрыні Свае, СПАДАРУ!

ТЭТ. Спагадны і праведны Госпад, таму наставіць грэшнікаў на шлях;
 
Добры а верны СПАДАР; і затым наўчае грэшнікаў у дарозе;

ЁД. пакорлівых накіруе па справядлівасці, наставіць сціплых на шляхі іх.
 
Водзе лагодных у судзе і наўчае лагодных дарогі Свае.

КАФ. Усе шляхі Божыя — міласэрнасць і праўда для тых, што трымаюцца запавету Яго і сведчанняў Яго.
 
Усі дарогі СПАДАРОВЫ — ласка а праўда тым, што дзяржаць змову Ягоную а сьветчаньні Ягоныя.

ЛЯМЭД. Дзеля імя Твайго, Госпадзе, злітуешся над грахом маім: бо ён так вялікі.
 
Дзеля імені Свайго, СПАДАРУ, даруй бяспраўе мае, бо яно вялікае.

МЭМ. Хто той чалавек, які шануе Госпада? Ён наставіць такога на шлях, які [той] выбірае.
 
Хто тый муж, што баіцца СПАДАРА? Ён наўчае ў дарозе, што яму абраць.

НУН. Душа яго ў дабротах прабудзе, а семя яго ўспадкаеміць зямлю.
 
Душа ягоная ў дабру будзе перабываць, і насеньню ягонаму спадзець зямля.

САМЭК. Спагадае Госпад тым, што баяцца Яго, каб адкрыць ім Свой запавет.
 
Тайна СПАДАРОВА тым, што баяцца Яго, і змову Сваю Ён азнаймляе ім.

АЙН. Мае вочы заўсёды да Бога, бо Ён вырве ногі мае з пасткі.
 
Вочы мае штачасна да СПАДАРА, бо Ён выблытае ізь сеці ногі мае.

ФЭ. Глянь на мяне і пашкадуй мяне, бо самотны я і няшчасны.
 
Абярніся да мяне й зьмілуйся над імною, бо я адзінокі а гаротны.

САДЭ. Пашыр цясніны сэрца майго і вырві мяне з засмучэнняў маіх.
 
Гарота сэрца майго пашырылася, — з уціскаў маіх вывядзі мяне.

Прыглядзіся да пакорлівасці маёй і да цяжару працы маёй і адпусці ўсе правіны мае.
 
Зваж на гора мае а стому маю і даруй усі грахі мае.

РЭС. Глянь на ворагаў маіх, бо яны размножыліся, і лютай нянавісцю зненавідзелі мяне.
 
Глянь на непрыяцеляў маіх, бо іх шмат, і глабальнаю ненавіднасьцю ненавідзяць яны мяне.

СІН. Пільнуй душу маю і вырві мяне; не пасаромлюся, бо я ўсклаў надзею на Цябе.
 
Усьцеражы душу маю, і вывальні мяне; няхай ня буду паганьбены, бо я здаюся на Цябе.

ТАЎ. Хай бязвіннасць і справядлівасць пільнуюць мяне, бо я трымаўся Цябе.
 
Беззаганнасьць а пасьцівасьць хай крыюць мяне, бо я на Цябе спадзяюся.

ФЭ. Збаў, Божа, Ізраэль ад усіх няшчасцяў яго.
 
Выкупі, Божа, Ізраеля з усіх бедаў ягоных.