Псалтыр 96 псалом
Псалтыр
Пераклад Чарняўскага 2017 → Пераклад Яна Станкевіча
Спявайце Госпаду новую песню, спявай Госпаду, уся зямля.
Пейце СПАДАРУ новую песьню; пей СПАДАРУ, уся зямля.
Спявайце Госпаду, дабраслаўляйце імя Яго, абвяшчайце з дня ў дзень Яго збаўленне.
Пейце СПАДАРУ, дабраслаўце імя Ягонае, агалашайце дзень пры дню спасеньне Ягонае,
Абвяшчайце між паганамі хвалу Яго, сярод усіх народаў — цуды Яго.
Павядайце меж паган чэсьць Ягоную меж усіх людаў чудосы Ягоныя;
Бо вялікі ёсць Госпад, і годны хвалы бязмежнай, варты ўшанавання больш за ўсіх багоў.
Бо вялікі СПАДАР і вельма славуты, страшны Ён над усімі багамі.
Бо ўсе паганскія багі — марнасць, Госпад жа стварыў нябёсы.
Бо ўсі багі людаў — балваны, але СПАДАР нябёсы ўчыніў.
Велічнасць і прыгажосць перад абліччам Яго, магутнасць і аздоба — у свяцілішчы Яго.
Слава а вялічча перад відам Ягоным, сіла а харашыня ў сьвятыні Ягонай.
Прыносьце Госпаду, сем’і народаў, прыносьце Госпаду хвалу і магутнасць,
Прызнайце СПАДАРУ, радзімы людаў, прызнайце СПАДАРУ чэсьць а моц!
Прыносьце Госпаду хвалу імя Яго. Прыносьце ахвяры і ўваходзьце ў дзядзінец Яго.
Прызнайце СПАДАРУ чэсьць імені Ягонага; прынясіце дар ды йдзіце да панадворкаў Ягоных;
Пакланіцеся Госпаду са святой урачыстасцю. Трымці перад абліччам Яго, уся зямля.
Сьціце СПАДАРА ў харашыні сьвятасьці, дрыжы перад Ім, уся зямля!
Кажыце сярод народаў: Госпад заваладарыў, бо Ён выправіў сусвет, які не пахіснецца; будзе судзіць Ён народы па справядлівасці.
Кажыце меж паганаў: «СПАДАР гаспадарствуе; нават сьвет Ён умацаваў, не пахісьнецца. Ён будзе судзіць люды ў справядлівасьці».
Хай весяляцца нябёсы і радуецца зямля, хай шуміць мора і ўсё, што яго запаўняе.
Цешчася, нябёсы, і весяліся, зямля, раві, мора а паўніня яго.
Хай цешацца палі і ўсё, што на іх. Тады ўзрадуюцца ўсе лясныя дрэвы,
Хай цешыцца поле а ўсе, што на ім; тады запяюць усі дзервы лесавыя
перад абліччам Госпада, бо Ён прыходзіць, бо Ён прыходзіць судзіць зямлю. Будзе Ён судзіць сусвет справядліва і народы паводле Сваёй праўды.
Перад СПАДАРОМ, бо Ён прыходзе, бо Ён прыходзе судзіць зямлю. Ён будзе судзіць сьвет справядліва і люды ў вернасьці Сваёй.
