Псалтыр 33 псалом

Псалтыр
Пераклад Чарняўскага 2017 → Пераклад Яна Станкевіча

 
 

Весяліцеся, справядлівыя, у Госпадзе; справядлівым належыцца пахвала.
 
Гукайце з радасьці, справядлівыя, у СПАДАРУ! пасьцівым выпадае хваліць.

Вызнавайце Госпада на гуслях, грайце Яму на псалтыры дзесяціструннай.
 
Хваліце СПАДАРА на гарпе, на ліры дзесяціструннай грайце яму.

Спявайце Яму новую песню, стройна Яму грайце з ускліканнямі.
 
Пейце Яму новую песьню; умела грайце, з гуканьням;

Бо праўдзівае слова Божае, і ўсе справы Яго верныя.
 
Бо слова СПАДАРОВА справядлівае, і ўсі справы Ягоныя ў вернасьці.

Ён любіць справядлівасць і закон, зямля поўная міласэрнасці Госпада.
 
Ён любе справядлівасьць а суд; ласкі СПАДАРОВАЕ поўная зямля.

Словам Госпадавым створаны нябёсы і дыханнем вуснаў Яго кожная сіла іх.
 
Словам СПАДАРОВЫМ нябёсы былі ўчынены, і духам вуснаў Ягоных — усі іх войскі.

Быццам у мяшок, збірае Ён воды марскія, у скарбніцах складае бяздонні.
 
Як у гурбу, Ён зьбірае воды мора, у склады кладзець глыбіні.

Хай уся зямля баіцца Бога, перад абліччам Яго хай трымцяць усе жыхары свету.
 
Бойцеся СПАДАРА, уся зямля, будуць баяцца яго ўсі жыхары сьвету;

Бо Ён сказаў, і сталася; Ён загадаў і стварылася.
 
Бо Ён казаў, і сталася; Ён расказаў, і ўстанавілася.

Госпад разбурае намеры паганаў, пустымі робіць задумы людзей.
 
СПАДАР разбурае рады народаў, нішча думкі людаў.

Намер Госпада трывае павечна, задумы Яго сэрца з роду ў род.
 
Рада СПАДАРОВА на векі трывае, думкі сэрца Ягонага з роду ў род.

Шчасны той народ, для якога Госпад — гэта Бог, і той народ, які Ён выбраў Сабе ў спадчыну.
 
Шчасьлівы народ, каторага СПАДАР ё Бог, люд, каторы Ён абраў за свой спадак!

Госпад глядзіць з неба, бачыць усіх сыноў чалавечых.
 
Зь нябёс глядзіць СПАДАР, бача ўсіх сыноў людзкіх;

Зірнуў Ён з месца Свайго пражывання на ўсіх тых, што насяляюць зямлю.
 
З пасаду, ідзе сядзіць, Ён аглядае ўсіх жыхараў зямлі.

Ён, Які ўтварыў кожнаму паасобку сэрцы іх, Які разумее ўсе справы іх.
 
Ён, Каторы хармуе сэрцы іх усіх і разумее ўсі ўчынкі іхныя.

Не бывае вызвалены цар вялікай сілай і не вызваліцца волат дзякуючы вялікай сіле сваёй.
 
Кароль не ратуецца вялікім войскам, і дужасіл ня вывальніцца вялікаю сілаю.

Ненадзейны конь для выратавання, і вялізнай сілай сваёй не ўратуе.
 
Абмыльны конь на спасеньне, і вялікаю сілаю сваёю ён ня дасьць змогі ўцячы.

Вось вочы Госпада над тымі, што Яго баяцца, і да тых, якія спадзяюцца на Яго ласку.
 
Вось, вока СПАДАРОВА на тых, што баяцца Яго, на тых, што спадзяюцца на ласку Ягоную,

Каб вырваў Ён у смерці душы іх і каб карміў іх у час голаду.
 
Каб ратаваць ад сьмерці душы іхныя і жывіць іх у галадоў.

Душа наша мае надзею на Госпада. Ён — наш памочнік і абарона,
 
Душа наша чакае СПАДАРА: помач наша а шчыт наш Ён;

бо ў Ім узрадуецца наша сэрца, і ў імю Яго мы знайшлі надзею.
 
Бо ў Ім вяселіцца сэрца нашае, бо на імя Ягонае сьвятое мы спадзяемся.

Дык няхай жыве міласэрнасць Твая, Госпадзе, да нас, як і мы ўскладаем надзею на Цябе.
 
Хай ласка Твая СПАДАРУ, будзе над намі, як мы спадзяемся на Цябе.