Псалтыр 72 псалом

Псалтыр
Пераклад Чарняўскага 2017 → Пераклад Яна Станкевіча

 
 

Пра Саламона. Давідаў. Божа, суд Твой перадай цару і справядлівасць Тваю сыну царскаму.
 
Салямонава. Божа, суды Свае дай каралю і справядлівасьць Сваю каралевічу.

Хай валадарыць па справядлівасці над народам Тваім, а над убогімі Тваімі па законе.
 
Няхай судзе люд Твой у справядлівасьці і ўбогіх Тваіх судам.

Хай горы прынясуць мір для народа, а ўзгоркі — справядлівасць.
 
Няхай горы даюць супакой люду і ўзгоркі — справядлівасьць.

Ён судзіць будзе жабракоў народа і збавіць сыноў убогага і ўпакорыць паклёпніка.
 
Няхай ён судзе ўбогіх люду, вывальняе дзеці бедных і мяжджуле ўцісканьніка!

Будзе жыць ён разам з сонцам і пакуль свеціць месяц у пакаленні і пакаленні.
 
І будуць баяцца Цябе, пакуль сонца а пакуль месяц, з роду да роду.

Сыдзе ён, быццам дождж на траву і быццам залева, што абвадняе зямлю.
 
Ён зыйдзе, як дождж просьле касьбы, як каплі навадняючыя зямлю.

У днях яго зацвіце справядлівасць і паўната спакою, пакуль не пагасне месяц.
 
Заквіціць за дзён ягоных справядлівы і шмат супакою, пакуль будзе месяц.

будзе валадарыць ад мора аж да мора і ад ракі аж да ўскрайкаў сусвету.
 
І будзе мець дзяржаву ад мора аж да мора і ад Ракі аж да канцоў зямлі.

Перад ім будуць падаць жыхары пустыні, і непрыяцелі яго лізаць будуць зямлю.
 
Перад відам ягоным уклякнуць жыхары пустыняў, і злосьнікі ягоныя будуць лізаць пыл.

Цары Тарсіса і вострава прынясуць дары, цары Арабаў і Сабы дашлюць яму падарункі.
 
Каралі Таршышу а абтокаў дадуць дань, каралі Шэвы а Сэвы дабліжаць дар.

І паклоняцца яму ўсе цары, і ўсе народы служыць яму будуць.
 
І паклоняцца яму ўсі каралі, усі народы будуць служыць яму;

Бо ён вызваліць убогага, які прызывае яго, і беднага, у якога не было ўспаможцы.
 
Бо ён вывальне беднага, як тый гукае, убогага, памагатыра нямаючага.

Пашкадуе ён беднага і ўбогага, і душы бедных ён уратуе.
 
Ён будзе мець жаласьць над галечаю а бедным і душы бедных уратуе;

Уратуе ён душы іх ад прыгнёту і гвалту, і кроў іх дарагая будзе для яго.
 
Ад уціску а ўсілства адкупляе душы іх, і дарагая кроў іхная ў ваччу ягоным.

Дык будзе жыць ён, і дадуць яму ад золата Арабіі, і будуць маліцца за яго заўсёды; цэлы дзень дабраслаўляць будуць яго.
 
Будзе жыць, і дадуць яму із золата Шэвы, і будуць маліцца за яго кажначасна, увесь дзень дабраславіць яго.

І будзе дастатак хлеба на зямлі, закалышацца ён на вяршынях гор; быццам Лібан, плод яго, і расквітнее [насельніцтва] гарадоў, быццам трава зямлі.
 
Будзе множасьць збожжа на зямлі, на вярхох гор; будзе хвалявацца, як лес Лібану, садавіна яго, і заквітуць у местах людзі, як кветкі на зямлі.

Хай будзе дабраславёна імя яго вечна, пакуль [свеціць] сонца, будзе жыць імя яго. І будуць дабраславёныя ў ім усе пакаленні зямныя, усе народы ўзвялічаць яго.
 
Будзе імя ягонае на векі, перад сонцам будзе трываць імя ягонае. І дабраславяцца ім усі народы, будуць зваць яго шчасьлівым.

Дабраславёны Госпад Бог, Бог Ізраэля, Які сам адзін творыць цуды.
 
Дабраславёны СПАДАР Бог, Бог Ізраеляў, Каторы адзін чыніш чудосныя рэчы.

І дабраславёнае імя велічнасці Яго навечна; і напоўніцца велічнасцю Яго ўся зямля. Хай будзе так, хай будзе!
 
І дабраславёнае імя сьці Ягонае на векі; няхай напоўне чэсьць Ягоная ўсю зямлю! Амін а Амін!

Скончыліся малітвы Давіда, сына Ясэева.
 
Скончаны малітвы Давіда Есянка.