Псалтыр 72 псалом
Псалтыр
Пераклад Чарняўскага 2017 → Пераклад Язэпа Германовіча
Пра Саламона. Давідаў. Божа, суд Твой перадай цару і справядлівасць Тваю сыну царскаму.
Саламона. О, Божа, даў суд твой цару і справядлівасьць тваю сыну цара!
Хай валадарыць па справядлівасці над народам Тваім, а над убогімі Тваімі па законе.
Каб ён кіраваў народам тваім справядліва і пакорнымі тваімі паводле права.
Хай горы прынясуць мір для народа, а ўзгоркі — справядлівасць.
Каб горы прынесьлі народу супакой і ўзгоркі — справядлівасьць.
Ён судзіць будзе жабракоў народа і збавіць сыноў убогага і ўпакорыць паклёпніка.
Каб рассудзіў уніжаных з народу, ратаваў дзяцей убогіх і скрышыў іхніх гвалтоўнікаў.
Будзе жыць ён разам з сонцам і пакуль свеціць месяц у пакаленні і пакаленні.
І будзе ён жыць з роду ў род, пакуль будзе сонца ды месяц.
Сыдзе ён, быццам дождж на траву і быццам залева, што абвадняе зямлю.
Няхай усходзе як дождж на атаву, як улева, што навадняе зямлю!
У днях яго зацвіце справядлівасць і паўната спакою, пакуль не пагасне месяц.
За яго дзён закрасуе справядлівасьць і мір глыбокі, пакуль трывае месяц.
будзе валадарыць ад мора аж да мора і ад ракі аж да ўскрайкаў сусвету.
І будзе ён панаваць ад мора да мора і ад Ракі — аж да краю зямлі.
Перад ім будуць падаць жыхары пустыні, і непрыяцелі яго лізаць будуць зямлю.
Перад ім паклоняцца праціўнікі, а ворагі яго лізаць будуць пыл (зямлі).
Цары Тарсіса і вострава прынясуць дары, цары Арабаў і Сабы дашлюць яму падарункі.
Цары Тарсу і астравоў прыносяць яму дарункі, цары Арабіі і Сабы дадуць ахвяры.
І паклоняцца яму ўсе цары, і ўсе народы служыць яму будуць.
І паклоняцца яму ўсе цары, усе народы яму служыць будуць.
Бо ён вызваліць убогага, які прызывае яго, і беднага, у якога не было ўспаможцы.
Бо ён паратуе ўбогага, які помачы кліча і няшчаснага, што помачы не мае.
Пашкадуе ён беднага і ўбогага, і душы бедных ён уратуе.
Ён літуецца над слабым і небаракам і збавіць душы беднякоў.
Уратуе ён душы іх ад прыгнёту і гвалту, і кроў іх дарагая будзе для яго.
З уціску і гвалту вызваліць іх душы, і дарагая будзе іхняя кроў у ягоных вачах.
Дык будзе жыць ён, і дадуць яму ад золата Арабіі, і будуць маліцца за яго заўсёды; цэлы дзень дабраслаўляць будуць яго.
(Няхай жыве і хай даюць яму золата з Сабы!) і будуць маліцца за яго заўсёды, і багаслаўляць штодня (яму).
І будзе дастатак хлеба на зямлі, закалышацца ён на вяршынях гор; быццам Лібан, плод яго, і расквітнее [насельніцтва] гарадоў, быццам трава зямлі.
Будзе багацьце збожжа на зямлі — аж да верху гораў! Празьмерна, як на Ліване (лясы), будуць шумець каласы і ў гарадах расцьвітуць (людзі) як трава ў полі.
Хай будзе дабраславёна імя яго вечна, пакуль [свеціць] сонца, будзе жыць імя яго. І будуць дабраславёныя ў ім усе пакаленні зямныя, усе народы ўзвялічаць яго.
Хай будзе багаслаўлёнае ягонае Імя навекі, пакуль сонца будзе трываці. Багаслаўлёныя будуць у ім усе плямёны зямлі і будуць славіць яго ўсе народы.
Дабраславёны Госпад Бог, Бог Ізраэля, Які сам адзін творыць цуды.
Хай будзе пахвалёны Госпад, Бог Ізраіля, які Сам адзін творыць цуды!
І дабраславёнае імя велічнасці Яго навечна; і напоўніцца велічнасцю Яго ўся зямля. Хай будзе так, хай будзе!
І багаслаўлена хай будзе ягонае слаўнае Імя навекі! Уся зямля няхай поўніцца славай ягонай! Аман! Аман!
Скончыліся малітвы Давіда, сына Ясэева.
Канец малітваў Давіда, сына Ессея.