Псалтыр 145 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Хваленні. Давіда. АЛЕФ. Буду ўзвышаць Цябе, Божа мой, Валадару, і дабраслаўлю імя Тваё вечна і на векі вечныя.
 
Гымн (песьня хвалебная) Давіда. Алеф. Вывышшаю Цябе, Цару мой і Божа і багаслаўлю Імя тваё заўсёды і навекі.

БЭТ. Кожны дзень буду дабраслаўляць Цябе і хваліць імя Тваё вечна і ў векі вечныя.
 
Бэт. Багаслаўляць Цябе жадаю што-дня і хваліць Імя тваё буду заўсёды і навекі.

ГІМЭЛЬ. Вялікі Госпад і вельмі варты хвалы, і няма спасціжэння велічы Яго.
 
Гімэль. Вялікі ёсьць Госпад і годны вялікай хвалы і веліч Яго — недасяжная.

ДАЛЕТ. Пакаленне пакаленню хваліць справы Твае, і апавяшчае моц Тваю.
 
Далет. Няхай род роду хваліць творы твае і абвяшчае магутнасьць тваю.

ГЭ. Гавораць пра ўзвышнасць славы велічнасці Тваёй і абвяшчаюць цуды Твае.
 
Гэ. Аб велічы сьветлае славы тваей няхай успамінаюць (я ўспамінаю апавяданьне аб цудах тваіх).

ВАЎ. І кажуць пра магуцце пострахаў Тваіх і расказваюць пра вялікасць Тваю.
 
Ваў. Будуць гаварыць аб магутнасьці страшных дзеяньняў тваіх, і я буду абвяшчаць аб тваей велічы.

ДЗАЙН. Успаміны пра невычэрпнасць лагоднасці Тваёй будуць разносіць і справядлівасці Тваёй узрадуюцца.
 
Заін. Будуць абвяшчаць успаміны аб бязьмернай дабраце тваей і выслаўляць справядлівасьць тваю.

ГЭТ. Літасцівы і спагадны Госпад, доўгацярплівы і вялікай міласэрнасці.
 
Гэт. Госпад ёсьць ласкавы і міласэрны, няскоры да гневу і поўны любові.

ТЭТ. Ласкавы Госпад да ўсіх, і літасць Яго — над усімі справамі Яго.
 
Тэт. Госпад — добры для ўсіх, а міласэрдзе ягонае над усе ягоныя справы.

ЁД. Хай вызнаюць Цябе, Госпадзе, усе тварэнні Твае; і святыя Твае дабраслаўляць будуць Цябе.
 
Іод. Няхай дзякуюць Табе, Госпадзе, усе твае творы і твае прыяцелі няхай багаславяць Цябе!

КАФ. Хай кажуць пра славу Валадарства Твайго і хай гавораць пра моц Тваю,
 
Каф. Няхай апавядаюць аб славе Валадарства твайго і магутнасьць яго абвяшчаюць! —

ЛЯМЭД. каб даць спазнаць сынам чалавечым моц Тваю і славу велічнасці Валадарства Твайго.
 
Лямэд. Каб даць вестку людзям пра тваю магутнасьць і пра бляск славы твайго валадарства.

НУН. Верны Госпад ва ўсіх словах Сваіх і святы ва ўсіх справах Сваіх.
 
Мэм. Царства тваё — царства ўсіх вякоў і валадарства тваё над усімі радамі. (Нун). Верны ёсьць Госпад у-ва ўсіх сваіх словах, Ён ёсьць любоў у-ва ўсіх сваіх творах.

САМЭК. Госпад падымае ўсіх, што падаюць, і падтрымлівае ўсіх зняможаных.
 
Самэх. Госпад падтрымлівае усіх тых, хто ўпадзе і падыймае усіх тых, што былі прыгнутыя.

АІН. Вочы ўсіх з надзеяй глядзяць на Цябе, і Ты дасі ім ежу ў час належны.
 
Аін. Вочы ўсіх на Цябе, яны маюць надзею: Ты даеш ім ежу ў сваім часе.

ФЭ. Ты адкрываеш руку Тваю і напаўняеш кожную жывёлу.
 
Фэ. Ты расчыняеш руку тваю і усё жывое насычаеш для задавальненьня (?)

САДЭ. Госпад справядлівы на ўсіх дарогах Сваіх і святы ва ўсіх справах Сваіх.
 
Садэ. Справядлівы Госпад на ўсіх шляхох сваіх; Ён ёсьць любоў у-ва ўсіх справах сваіх.

КОФ. Госпад блізкі тым, што прызываюць Яго, усім, якія прызываюць Яго ў праўдзе.
 
Коф. Госпад ёсьць блізка да ўсіх, што Яго прызываюць; да ўсіх, што Яго шчыра клічуць.

РЭС. Спаўняе ён просьбу тых, што шануюць Яго, і пачуе іх кліканне, і збавіць іх.
 
Рэш. Ён спаўняе ўпадабаньне тых, што Яго баяцца і чуе іх голас і збаўляе іх.

СІН. Госпад апякуецца над усімі, хто любіць Яго, а ўсіх грэшнікаў нішчыць.
 
Шын. Госпад сьцеражэ ўсіх тых, якія любяць Яго, а ўсіх бязбожных Ён выгубіць.

ТАЎ. Хай хваляць Госпада вусны мае, і хай усякае стварэнне дабраслаўляе святое імя Яго ў векі вечныя.
 
Таў. Няхай мае вусны галосяць хвалу Гасподнюю і ўсякае цела хай багаславіць Яго сьвятое Імя, заўсёды і навекі!