Псалтыр 92 псалом
Псалтыр
Пераклад Чарняўскага 2017 → Пераклад Язэпа Германовіча
Псальм. Песня. На дзень шабату.
Псальм. Песьня на дзень суботы.
Як жа добра вызнаваць Госпада і спяваць псальмы імю Твайму, Найвышэйшы!
Добра ёсьць дзякаваць Госпаду і славіць (у псальмах) Імя тваё, Найвышэйшы!
Раніцай абвяшчаць Тваю міласэрнасць, і праўду Тваю — уначы.
Абвяшчаць спазаранку любоў тваю, а доўгімі начамі вернасьць тваю.
На дзесяціструнным, і на гуслях, са спевам пад цытру.
На дзесяціструннай ліры і гусьлях іграючы з песьняю на арфэ.
Бо пацешыў Ты мяне, Госпадзе, Сваім стварэннем, і я буду радавацца справам рук Тваіх.
Бо Ты узьвесяліў мяне, Госпадзе, тваімі учынкамі, і я цешуся творамі рук тваіх.
Якія ж велічныя справы Твае, Госпадзе: надзвычай глыбокімі сталіся задумы Твае!
Як вялізны ёсьць дзеяньні твае, Госпадзе; як назадзіў глыбокія мысьлі твае.
Неразумны чалавек не спазнае і бязглузды не зразумее гэтага.
Чалавек бязглузды ня зьведае гэтага і неразумны нічога не сьцяміць.
Няхай грэшныя разрастуцца, як трава, і будуць квітнець усе тыя, што чыняць несправядлівасць, аднак гэта будзе [ім] на згубу на векі вечныя;
Калі бязбожныя буяюць як пустазельле, калі цьвітуць усе злачынцы, дык каб навек яны былі зьнішчаны!
а Ты, Госпадзе, вечна Найвышэйшы.
Але Ты, Госпадзе, узвышаны навекі.
Бо вось, непрыяцелі Твае, Госпадзе, бо вось, непрыяцелі Твае загінуць і расцярушацца ўсе, што чыняць несправядлівасць.
Бо вось, Госпадзе, ворагі твае гінуць, усе злачынцы рассыпаюцца.
Ты ўзвысіш рог мой, як у адзінарога, атрымаў я багатае намашчэнне алейкам.
Ты узносіш рог мой як-бы рог бавола, Ты выліваеш на мяне алей найчысьцейшы.
Вока маё з пагардаю глядзела на непрыяцеляў маіх, ды пра загубу ліхотнікаў, што паўстаюць на мяне, пра ліхадзеяў радасна слухала вуха маё.
І вока маё бачыла ворагаў маіх і вушы мае чулі аб злачынцах.
Справядлівы будзе квітнець, як пальма; быццам кедр лібанскі, узрасце.
Праведны зацьвіце як пальма, разрасьцецца як кедр на Лібане.
Пасаджаныя ў Госпадавым доме, у дзядзінцы Бога нашага заквітнеюць.
Пасаджаныя у доме гасподнім — яны разрастуцца на панадворках Бога нашага.
Будуць прыносіць плады ў старасці, сакавітыя будуць і поўныя свежасці,
І у старасьці сваей даюць яшчэ плод, будуць сьвежыя і цьвітучыя,
Каб вясціць, што Госпад справядлівы, прыстанішча маё, і няма несправядлівасці ў Ім.
Каб абвяшчаць, які Госпад ёсьць справядлівы, скала мая і няма ў Ім няпраўды.
