Псалтыр 5 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Кіраўніку хору. На флейце. Псальм Давідаў.
 
Кіраўніку хору, на флейтах. Псальм Давідавы.

Словы мае пачуй, Госпадзе; зразумей стагнанне маё,
 
Пачуй, Госпадзе, мае словы, уваж на маё ўздыханьне.

узваж на голас клічу майго, Валадару мой і Божа мой! Бо я малю Цябе, Госпадзе:
 
Зважай на голас маёй просьбы, Цару мой і Божа мой, бо да цябе я малюся!

раніцаю выслухай голас мой; раніцаю стану я перад Табою і буду чакаць.
 
Госпадзе, пачуй спазаранку мой голас: раніцай стаю прад Табою з маею малітваю і чакаю.

Бо Ты не такі Бог, якому падабалася б несправядлівасць, ліхі не паселіцца пры Табе,
 
Бо Ты ёсць Бог, які ня любіш нягоднасці: ліхі (чалавек) ня будзе з табою.

і несправядлівыя не застаюцца перад вачамі Тваімі. Ненавідзіш Ты ўсіх, што чыняць беззаконнасць,
 
Злачынцы не ўстаяць прад тваімі вачамі: Ты ненавідзіш усіх ліхадзеяў.

выгубіш усіх, якія гавораць няпраўду; мужам, прагным крыві і крывадушным, брыдзіцца Госпад.
 
Ты выгубляеш тых, што гамоняць няпраўду, Чалавекам-крывасмокам і падступным брыдзіцца Госпад.

А я вось у мностве міласэрнасці Тваёй увайду ў дом Твой; пакланюся святому храму Твайму ў страху Тваім.
 
Але я — праз багатую ласку тваю — ўвайду ў дом твой, і ў баязні тваёй пакланюся прад сьвятыняй тваёю.

Вядзі мяне ў справядлівасці Тваёй дзеля ворагаў маіх, выраўняй дарогу Тваю перад маімі вачамі.
 
Госпадзе, вядзі мяне ў тваёй справядлівасьці: супраць ворагаў маіх выпрастуй шлях твой прада мною!

Бо ў вуснах іх няма праўды, сэрца іх — пастка, горла іх — магіла адкрытая, робяць ліслівымі яны языкі свае.
 
Бо няма шчырасьці ў вуснах іхніх: у сэрцы іх здрада, горла іх як адчынена магіла, а язык іх лісьлівы.

Асудзі іх, Божа; хай прападуць ад задум сваіх; дзеля мноства злачынстваў іх выгані іх, бо яны ўгнявілі Цябе, Госпадзе.
 
Асудзі Ты іх, Божа! Няхай скрышацца ў сваіх імкненьнях, — Ты адкінь іх за множства злачынстваў, — за іхні бунт прад Табою!

Пацешацца ўсе, што спадзяюцца на Цябе, будуць радавацца яны вечна. І ўмацуеш іх, і будуць ганарыцца Табою тыя, якія мілуюць імя Тваё.
 
Няхай цешацца ўсе, што на цябе спадзяюцца, няхай весяляцца навекі: Засланяй іх і хай радуюцца Табою, якія мілуюць Тваё імя.

Бо Ты дабраслаўляеш справядлівага, Госпадзе, і добразычлівасцю, быццам шчытом, асланяеш яго наўкола.
 
Бо Ты багаслаўляеш справядлівага, Госпадзе: як шчытом ласкай тваёй закрываеш.