Псалтыр 103 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Давідаў. Дабраславі, душа мая, Госпада, і ўсё, што ёсць ува мне, — імя святое Яго.
 
Давідавы. Багаслаў, душа мая Госпада! З усяго нутра майго — імя сьвятое Яго!

Дабраславі, душа мая, Госпада ды не забывай пра ўсе даброцці Яго.
 
Багаслаў душа мая Госпада і не забывайся ніякіх дабрадзействаў Яго!

Ён адпускае ўсе твае правіннасці, Ён лечыць усе кволасці твае.
 
Ён, Які адпускае усе правіны твае, які лечыць цябе з усякае слабасьці

Ён адкупае душу тваю ад загубы, Ён вянчае цябе міласэрнасцю і літасцю;
 
Які жыццё тваё ратуе ад згубы (ад магілы), які карануе цябе любоўю і ласкавасьцяй.

Ён напаўняе дабротамі пры жыцці цябе, аднаўляецца, як у арла, маладосць твая.
 
Які насычае дабром гады твае і як арліная аднаўляецца маладосьць твая.

Госпад, што чыніць справядлівасць і суд для ўсіх, хто церпіць крыўду,
 
Госпад, які творыць правасудзьдзе і належны суд для усіх прыгнечаных.

Ён даў Майсею спазнаць шляхі Свае, сынам Ізраэля — справы Свае.
 
Ён паказаў шляхі свае Майсею, учынкі свае вялікія дзецям Ізраіля.

Літасцівы і спагадны Госпад, доўгацярплівы і вельмі міласэрны.
 
Міласэрны Госпад і ласкавы, да гневу няскоры і шчодры на любоў.

Не бясконца Ён сварыцца ды не вечна будзе гневацца.
 
Не бясконца Ён будзе заўзяты і не назаўсёды гневам палае.

Не адгаджае нам паводле грахоў нашых і не помсціць нам за правіннасці нашыя.
 
Няводле грахоў нашых Ён нам аддае і не паводле правінаў нашых адплачвае,

Бо, наколькі ўзвышаецца неба над зямлёю, настолькі перавышае міласэрнасць Яго страх Яго.
 
Але, як высока неба над зямлёю, так магутна любоў Яго для тых, што Яго баяцца.

Як далёкі ўсход ад захаду, так аддаляе Ён ад нас грахі нашы.
 
Як далёкі ўсход ад захаду, так аддаляе Ён нашыя грахі ад нас

Як бацька літуецца над сынамі, так Госпад злітаваўся над тымі, што шануюць Яго.
 
Як літуецца бацька над сынамі, так літасьцівы Г-д над тымі, што Яго баяцца.

Бо Ён спазнаў стварэнне наша, успомніў, што мы — пыл.
 
Ён ведае, з чаго мы зьлеплены, — памятае, што мы — толькі пыл. О, чалавек!

Быццам трава дні людскія, чалавек цвіце, як краска палявая,
 
Дні ягоныя як травы: як краска ў полі як, так ён цьвіце.

ледзь павее на яе вецер, і ўжо няма яе, і месца яе невядомае.
 
Ледзь подмух ветру прамкнець і няма ўжо яго, і ягонае месца не пазнае яго.

А міласэрнасць жа Госпадава спрадвеку па век над тымі, што шануюць Яго, а справядлівасць Яго — для сыноў сынавых.
 
Але любоў Госпада над тымі, што Яго баяцца трывае ад веку й да веку і справядлівасьць ягоная над сынамі сыноў іхніх.

Для тых, якія трымаюцца запавету Яго і памятаюць прыказанні Яго, каб спаўняць іх.
 
Над тымі, што сьцерагуць запавет Яго ды законы Яго памятаюць, спаўняці.

Госпад у небе падрыхтаваў пасад Свой, і валадарыць Ён над усім светам.
 
Госпад умацаваў пасад свой на нябёсах і над усім пануе Яго валадарства.

Дабраслаўляйце Госпада, усе анёлы Яго, моцныя магуццем, робячы па слове Яго на паслухмянасць голасу мовы Яго.
 
Багаслаўце Госпада, усе Ангелы Яго, магутныя сілаю, што выпаўняеце загады Яго, пакорныя голасу слова Яго!

Дабраслаўляйце Госпада, усе магуцці Яго, слугі Яго, якія выконваеце волю Яго.
 
Багаслаўце Госпада, ўсе войскі Яго, слугі Яго, што выпаўняеце волю Яго!

Дабраслаўляйце Госпада, усе справы Яго, і ў кожным месцы Яго валадарання дабраславі, душа мая, Госпада!
 
Багаслаўце Госпада, ўсе творы Ягоныя па ўсіх месцах Яго валадарства! Багаслаў душа мая Госпада!