Псалтыр 40 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Кіраўніку хору. Псальм Давідаў.
 
Кіраўніку хору. Псальм Давідавы.

Чакаючы, дачакаўся я Госпада, і Ён схіліўся да мяне.
 
Чакаў я зь вялікай надзеяй на Госпада і Ён схіліўся нада мною і выслухаў маё маленьне.

І выслухаў лямантаванне маё, і вывеў мяне з долу пакуты і з балоцістай багны; і паставіў Ён на камень ногі мае і ўмацаваў хаду маю.
 
Вывеў мяне зь ямы пагібельнай, зь цяністага балота і ногі мае паставіў на скале, узмацняючы крокі мае.

У вусны мае ўклаў Ён песню новую, песню Богу нашаму. Убачаць многія і спалохаюцца, і будуць мець надзею ў Богу.
 
У вусны мае ўлажыў новую песьню — хвалу нашаму Богу. Многія ўбачаць і ўбаяцца і давераць будуць Госпаду.

Шчасны чалавек, які спадзяванне сваё ўсклаў на Госпада і не зважае на ганарыстых ды тых, што схіляюцца да маны.
 
Шчасьлівы ёсьць той чалавек, які надзею сваю ўскладае на Госпада і ня схіляецца да непакорных і да тых, што блудзяць у няпраўдзе!

Безліч учыніў Ты, Госпадзе, Божа мой, цудаў Тваіх, што ж да Тваіх задум аб нас — то няма таго, хто б быў падобны да Цябе. Калі захачу я абвясціць і ўчыніць прамову, яны памножацца звыш меры.
 
О, колькі Ты, Госпадзе Божа мой, учыніў цудаў і замыслаў тваіх дзеля нас! Нікога няма Таба роўнага. Я хацеў бы гэта абвяшчаць і пераказаць, дый лішне іх многа, каб іх палічыць.

Ахвяры і прынашэння не захацеў Ты, але цела мне прыгатаваў. Цэласпалення нават за грэх не патрабаваў Ты,
 
Ахвярай (жэртваў) і дараў Ты не жадаў, але Ты вушы мне адчыніў. Ты не хацеў жэртваў і цэлапаленьняў за грэх.

тады сказаў я: «Вось, іду; на пачатку кнігі напісана пра мяне.
 
Тады я сказаў: “Вось я іду! у кніжным зьвітку мне прадпісана. . . ”

Захацеў я, Божа мой, выканаць волю Тваю; і закон Твой — у сэрцы маім».
 
Тварыць волю тваю, Божа мой, роскаш мая і Закон твой — у глыбіні майго сэрца.

Расказаў я пра справядлівасць Тваю ў вялікай святыні; вось, вусны мае не буду стрымліваць я; Госпадзе, Ты зведаў.
 
Я абвяшчаў справядлівасьць Госпада ў вялізнай грамадзе і вуснаў маіх я не спыняў, — Ты гэта ведаеш.

Справядлівасці Тваёй не хаваў я ў сэрцы маім, расказаў пра праўду Тваю і збавенне Тваё. Не хаваў я міласэрнасці Тваёй і праўды Тваёй у вялікай святыні.
 
Справядлівасьці тваей я не ўкрываў у глыбіні майго сэрца: я гаварыў пра вернасьць тваю і ўспамогу тваю, я не затаіў тваей міласьці і тваей праўды перад вялікім зборам.

Ты ж, Госпадзе, не аддаляў літасцей Тваіх ад мяне; міласэрнасць Твая і праўда Твая заўсёды падтрымліваюць мяне,
 
А Ты, Госпадзе, не зачыняй ласкавасьці тваей ад мяне! Міласьць твая — магутная і праўда твая няхай захавае мяне заўсёды!

бо ліха з усіх бакоў абступіла мяне, і няма яму вылічэння; аблыталі мяне правіннасці мае, і не здолеў я ўбачыць [іх]. Сталася іх больш, чым валасоў на галаве маёй, і сэрца маё пакінула мяне.
 
Дый беды аблягаюць мяне — нельга іх палічыць: мае праступкі зваліліся на мяне, так што не магу іх больш бачыць! Іх больш як валосься на маей галаве і сэрца маё ўпала.

Зрабі ласку, Госпадзе, каб вырваць мяне; Госпадзе, паспяшайся, каб падтрымаць мяне.
 
Будзь ласкаў, Госпадзе, збавіць мяне: пасьпяшы на ўспамогу мне, Госпадзе!

Хай пасаромяцца і збянтэжацца ўсе тыя, хто шукаюць душу маю, каб забраць яе. Хай павернуцца назад і хай пачырванеюць тыя, што жадаюць мне ліха.
 
Няхай заўстыдаюцца і асаромяцца ўсе тыя, што шукаюць пагібелі для душы маей! Няхай павернуць назад ды пакрыюцца стыдам тыя, што цешацца з майго няшчасьця!

Хай аслупянеюць ад сораму свайго тыя, што кажуць мне: «Добра, добра!»
 
Няхай зьбянтэжацца ў сораме сваім тыя, што мне гукаюць: “Га-га!”.

Хай жа радуюцца і весяляцца ў Табе ўсе тыя, што шукаюць Цябе і кажуць заўсёды: «Хай узвялічыцца Госпад», — тыя, што любяць збаўленне Тваё.
 
Радасьць у Табе і вясельле няхай будзе ўсім тым, што Цябе шукаюць. Няхай гавораць заўсёды: ”Бог ёсьць вялікі” тыя, што любяць збаўленьне тваё.

А вось я няшчасны і бедны; але Бог рупіцца пра мяне. Ты — Успаможца мой і Вызваліцель. Божа мой, не марудзь.
 
А я — бедны і няшчасны! “Госпадзе, прыйдзі скора! Ты — мая ўспамога і Збавіцель, Мой Божа, не марудзь! (не баўся!)”.