Псалтыр 56 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Кіраўніку хору. Паводле «Галубка далёкіх тэрэбінітаў». Давідаў. Міктам. Калі яго філістынцы затрымалі ў Геце.
 
Кіраўніку хору. На лад: “Бязмоўная галубка — у мясцох далёкіх”. Залаты псальм Давідавы. Калі яго злавілі філістыны ў Гат.

Пашкадуй мяне, Божа, бо растаптаў мяне чалавек, цэлы дзень нападаючы, апанаваў мяне.
 
Зжалься нада мною, о Божа, бо мяне мучаць: кожны дзень ціснуць мяне, усьцяж нападаючы.

Тапталі мяне непрыяцелі мае цэлы дзень, бо шмат іх ваюе проці мяне, о Найвышэйшы!
 
Штодзень топчуць мяне мае ворагі, бо многія змагаюцца са мною, (о, Найвышэйшы!) падыймі мяне!

У які дзень нападзе на мяне страх, я ў Табе, Усемагутны, маю надзею.
 
Калі ж страх на мяне нападае, я на цябе спадзяюся.

У Богу, слова Якога я слаўлю, у Богу паклаў я надзею: не баюся: што можа зрабіць мне чалавек?
 
На Бога, якога я хвалю абяцаньне, на Бога я спадзяюся і не пабаюся, што мне зробіць чалавек.

Цэлы дзень перашкаджалі яны маім справам, усе задумы іх адносна мяне — на ліха.
 
Штодзень выкрыўляюць мае словы: усе іхнія думкі скіраваны мне на ліхое.

Усчынялі яны лаянку, строілі падкопы, самі сачылі за крокамі маімі. Так, як шукалі яны душу маю,
 
Зьбіраюцца, хаваюцца, сочаць крокі мае, каб схапіць душу маю.

так аддай ім за несправядлівасць, выгубі ў гневе народы, Божа.
 
За іх злачынствы адплаці ім: адкінь, о Божа, у гневе народы!

Ты палічыў вандраванні мае: пакладзі слёзы мае ў бурдзюку Тваім; ці не палічаны яны Табою?
 
Мае блуканьні Ты мне залічыў: зьбяры мае сьлёзы ў мяшок твой. Ці ж не запісаны яны ў кнізе тваей?

Тады павернуцца непрыяцелі мае назад, у які б дзень ні паклікаў я Цябе: вось, спазнаў, што Ты — мой Бог.
 
Тады мае ворагі павернуць наўцекі, калі заклічу Цябе: я тое ведаю, што Госпад са мною.

У Богу, слова Якога буду хваліць, у Госпадзе, слова Якога буду хваліць,
 
У Богу я хвалю слова: у Госпадзе я слаўлю слова.

у Богу маю я надзею, не буду баяцца: што зробіць мне чалавек?
 
На Бога спадзяюся і больш не баюся, што мне можа ўчыніць чалавек?

На мне, Божа, абяцанні Твае; аддам я ўхваленні Табе,
 
Я зьвязаны абяцаньнямі, якія я даў Табе, Божа: аддам Табе хвалебныя жэртвы.

бо Ты ўратаваў душу маю ад смерці і ногі мае ад падзення, каб хадзіў я перад Богам у святле жывых.
 
Бо Ты збавіў маю душу ад сьмерці і мае ногі ад упадку, каб я хадзіў перад Богам у сьветласьці жывых.