Псалтыр 85 псалом
Псалтыр
Пераклад Чарняўскага 2017 → Пераклад Язэпа Германовіча
Кіраўніку хору. Сыноў Корэ. Псальм.
Кіраўніку хору — сыноў Корэ — Псальм.
Спагадным быў Ты, Госпадзе, у Тваёй зямлі, перавярнуў Ты паланенне Якубава.
Ты зьлітаваўся, Госпадзе, над зямлёю тваёй; Ты вярнуў палонных Якуба.
Адпусціў Ты несправядлівасць народа Твайго, дараваў усе грахі іх.
Ты зьняў правіны з народу твайго, Ты закрыў усю ягоную віну.
Спыніў Ты ўвесь гнеў Твой, адступіўся ад абурэння раздражнёнасці Тваёй.
Ты ўтрымаў узбурэньне сваё і спыніў палючы гнеў твой.
Навярні нас, Божа, збаўленне наша, і адвядзі гнеў Твой ад нас.
Абнаві нас, Божа, Збавіцелю наш, і адлажы заўзятасьць тваё на нас.
Ці ж вечна будзеш гневацца на нас, ці ж прадоўжыш гнеў Твой з пакалення ў пакаленне?
Ці-ж будзеш гневацца на нас заўсёды і ці расцягнеш гнеў твой ад веку да веку?
Няўжо Ты, навярнуўшы, не ажывіш нас і народ Твой не ўзвесяліцца з Табою?
Няўжо не дасі нам аджыць нанова, і народ твой уцешыцца ў табе?
Госпадзе, пакажы нам Тваю міласэрнасць і дай нам Тваё збаўленне.
Дай нам, Г-дзе, ўбачыць ласку тваю і даруй нам збаўленьне тваё!
Паслухаю, што кажа Госпад Бог, бо, напэўна, вясціць Ён мір народу Свайму, і святым Сваім, і тым, якія ўсім сэрцам навяртаюцца да Яго.
Я слухаю! Што кажа Госпад? Бог гаворыць аб супакою для народу свайго і прыяцеляў сваіх, каб яны сэрцам не зьвярталіся да глупстваў.
Сапраўды блізкае збаўленне Яго для тых, што шануюць Яго, каб пасялілася слава на зямлі нашай.
Сапраўды, блізка ёсьць Яго збаўленьне тым, што Яго баяцца, каб слава Яго прабывала на нашай зямлі.
Міласэрнасць і праўда спаткаюцца паміж сабою, справядлівасць і мір пацалуюцца.
Міласэрзе і вернасьць сустракаюцца, спр-васьць і супакой цалуюцца.
Вернасць узнікне з зямлі, а справядлівасць прагляне з неба.
Вернасьць вырастае з зямлі, а справядлівасьць зь нябёсаў выхіляецца.
Бо Госпад дасць добразычлівасць, а зямля наша дасць плод свой.
Госпад Сам даруе шчасьце, а наша зямля дасьць свій плод.
Справядлівасць пойдзе перад Ім, і паставіць на дарозе крокі свае.
Справядлівасьць ідзе наперадзе Яго і супакой на шляху крокаў ягоных.