Псалтыр 85 псалом
Псалтыр
Пераклад Чарняўскага 2017 → Пераклад Яна Станкевіча
Кіраўніку хору. Сыноў Корэ. Псальм.
Кіраўніку хору. Сыноў Корыных. Псальма.
Спагадным быў Ты, Госпадзе, у Тваёй зямлі, перавярнуў Ты паланенне Якубава.
Ты прыяў зямлі Сваёй, СПАДАРУ, зьвярнуў палон Якаву,
Адпусціў Ты несправядлівасць народа Твайго, дараваў усе грахі іх.
Дараваў бяспраўі люду Свайго, закрыў усі грахі яго (Сэля),
Спыніў Ты ўвесь гнеў Твой, адступіўся ад абурэння раздражнёнасці Тваёй.
Забраў назад усе абурэньне Свае, узьдзержыўся ад палаючага гневу Свайго.
Навярні нас, Божа, збаўленне наша, і адвядзі гнеў Твой ад нас.
Зьвярні нас, Божа спасеньня нашага, і спыні гнеў Свой на нас.
Ці ж вечна будзеш гневацца на нас, ці ж прадоўжыш гнеў Твой з пакалення ў пакаленне?
Ці на векі будзеш гневаціся на нас? ці гнеў Свой расьцягнеш з пакаленьня ў пакаленьне?
Няўжо Ты, навярнуўшы, не ажывіш нас і народ Твой не ўзвесяліцца з Табою?
Ці Ты ня зьвернешся й не ажывіш нас, каб люд Твой цешыўся ў Табе?
Госпадзе, пакажы нам Тваю міласэрнасць і дай нам Тваё збаўленне.
Пакажы нам ласку Сваю, СПАДАРУ, і спасеньне Свае дай нам.
Паслухаю, што кажа Госпад Бог, бо, напэўна, вясціць Ён мір народу Свайму, і святым Сваім, і тым, якія ўсім сэрцам навяртаюцца да Яго.
Паслухаю, што кажа Бог СПАДАР, бо Ён будзе казаць супакой люду Свайму а дабрачэсьлівым Сваім; але хай не зварачаюцца ізноў да дурноты.
Сапраўды блізкае збаўленне Яго для тых, што шануюць Яго, каб пасялілася слава на зямлі нашай.
Запраўды блізка спасеньне Ягонае да тых, што баяцца Яго, каб чэсьць Яго жыла ў зямлі нашай.
Міласэрнасць і праўда спаткаюцца паміж сабою, справядлівасць і мір пацалуюцца.
Ласка а праўда сустрэліся, справядлівасьць а супакой пацалаваліся.
Вернасць узнікне з зямлі, а справядлівасць прагляне з неба.
Праўда ізь зямлі вырастае, і справядлівасьць ізь неба глядзіць далоў.
Бо Госпад дасць добразычлівасць, а зямля наша дасць плод свой.
Але, СПАДАР дасьць дабро, і зямля наша выдасьць плод свой.
Справядлівасць пойдзе перад Ім, і паставіць на дарозе крокі свае.
Справядлівасьць пойдзе перад Ім і аберне ў дарогу сігні Ягоныя.