Псалтыр 94 псалом

Псалтыр
Пераклад Чарняўскага 2017 → Пераклад Яна Станкевіча

 
 

Бог помстаў, Госпадзе! Божа, Бог помстаў, заззяй!
 
Божа помсты, СПАДАРУ, Божа помсты, зьявіся!

Узвысся Ты, што судзіш зямлю, аддай заплату пыхлівым.
 
Узьніміся, судзьдзя зямлі, аддай заплату гордым.

Дакуль жа бязбожнікі, Госпадзе, дакуль жа бязбожнікі будуць задавацца?
 
СПАДАРУ, пакуль нягодным, пакуль нягодным вяльмувацца?

Будуць вымаўляць і прамаўляць нахабствы, будуць выхваляцца ўсе тыя, што чыняць несправядлівасць?
 
Верашчэць, гукаць пыхата? усім, бяспраўе дзеючым, вяльмувацца?

Прыніжаюць яны, Госпадзе, народ Твой, прыгнятаюць спадчыну Тваю.
 
Люд Твой, СПАДАРУ, яны мяжджуляць і спадак Твой уціскаюць;

Удаву і прыхадня забіваюць і сірот мардуюць.
 
Удаве а чужаземцу робяць сьмерць, і сіроты забіваюць,

І кажуць яны: «Не бачыць Госпад, не разумее Бог Якубаў».
 
І кажуць: «ЯГ не абача, і не зразумее Бог Якаваў».

Зразумейце, неразумныя ў народзе, бязглуздыя, калі паразумнееце?
 
Зразумейце, недасьціпныя памеж люду, і дурныя, калі вы паразумнееце?

Ці ж Той, Хто насадзіў вуха, не пачуе? Або Той, што сфармаваў вока, не ўбачыць?
 
Ці Тый, што ўсадзіў вуха, не пачуе? Тый, што ўхармаваў вока, не абача?

Ці ж Той, Хто спасцігае народы, не выкрые, Той, Хто вучыць чалавека разуменню?
 
Ці Тый, што зырыў паган, ня будзе ўпікаць, Тый, што вуча чалавека веданьня?

Госпад ведае думкі людзей, што яны марныя.
 
СПАДАР ведае думкі чалавека, што яны пустыя.

Шчасны той чалавек, якога ўдасканальваеш Ты, Госпадзе, і паводле закону Твайго навучаеш яго,
 
Дабраславёны муж, каторага казьнера ЯГ і права Свайго навучае яго,

каб даць адпачыць яму ад ліхіх дзён, пакуль выкапаюць магілу для грэшніка.
 
Каб супакоіць яго ў дні нягоды, пакуль выкапаюць дол нягоднаму.

Бо не адкіне Госпад свайго народа і не пакіне спадчыны сваёй.
 
Бо СПАДАР не адкіне люду Свайго і спадку Свайго не пакіне;

Бо суд вернецца да справядлівасці, і пойдуць за ёю ўсе, хто праўдзівага сэрца.
 
Але суд зьвернецца да справядлівасьці, і ўсі пасьцівага сэрца будуць за ім.

Хто стане за мяне супраць ліхадзеяў або хто стане разам са мною супраць тых, што чыняць несправядлівасць?
 
Хто пастаіць за мяне на ліхадзеяў? хто стане за мяне на дзеючых бяспраўе?

Каб Госпад не ўспамог, хутка душа мая апынулася б у краіне маўклівасці.
 
Калі б не СПАДАР быў імне памачніком, душа мая траха перабывала б у маўчаньню.

Калі гавару я: «Нага мая хістаецца», міласэрнасць Твая, Госпадзе, падтрымлівае мяне.
 
Як я казаў: «Мая нага коўзаецца», ласка Твая, СПАДАРУ, падперла мяне.

Калі мноства турбот маіх у сэрцы маім, Твае суцяшэнні ўзвесяляюць маю душу.
 
У множасьці журлівых думак у імне пацехі Твае даюць прыемнасьць душы маёй.

Ці ж будзе з Табою сябраваць пасад несправядлівасці, які пад выглядам прыказання творыць пакуту?
 
Ці прыязьньства з Табою мае мець седава бяспраўя, каторае крыўды тарнуе да права?

Яны накідваюцца на душу справядлівага і асуджаюць кроў бязвінную.
 
Яны зьбіраюцца на душу справядлівага й вінуюць кроў нявінную.

І стаўся мне Госпад абаронаю і Бог мой — скалою прыстанішча майго;
 
І быў СПАДАР імне горадам, і Бог мой скалаю прытулішча майго;

і аддасць Ён ім іх несправядлівасць і ў ліхадзейнасці іх знішчыць іх. Знішчыць іх Госпад Бог наш.
 
І Ён паверне на іх бяспраўе іхнае, і ў нягоднасьці іхнай адатнець іх, адатнець іх СПАДАР, Бог наш.