Псалтыр 94 псалом
Псалтыр
Пераклад Чарняўскага 2017 → Пераклад Антонія Бокуна
Бог помстаў, Госпадзе! Божа, Бог помстаў, заззяй!
Божа помсты, ГОСПАДЗЕ, Божа помсты, зазьзяй!
Узвысся Ты, што судзіш зямлю, аддай заплату пыхлівым.
Узьніміся, Судзьдзя зямлі, аднагародзь пыхліўцам за тое, што зрабілі яны!
Дакуль жа бязбожнікі, Госпадзе, дакуль жа бязбожнікі будуць задавацца?
Дакуль бязбожнікі, ГОСПАДЗЕ, дакуль бязбожнікі будуць радавацца?
Будуць вымаўляць і прамаўляць нахабствы, будуць выхваляцца ўсе тыя, што чыняць несправядлівасць?
[Дакуль] будуць плявузгаць, прамаўляць дзёрзка? [Дакуль] будуць гаварыць усе злачынцы?
Прыніжаюць яны, Госпадзе, народ Твой, прыгнятаюць спадчыну Тваю.
Яны крышаць народ Твой, ГОСПАДЗЕ, прыціскаюць спадчыну Тваю.
Удаву і прыхадня забіваюць і сірот мардуюць.
Удоваў і прыхадняў мардуюць і сіротаў забіваюць,
І кажуць яны: «Не бачыць Госпад, не разумее Бог Якубаў».
і кажуць: «Ня ўбачыць гэтага ГОСПАД, і не даведаецца Бог Якуба!»
Зразумейце, неразумныя ў народзе, бязглуздыя, калі паразумнееце?
Зразумейце, бязглуздыя з народу! І калі, бязглуздыя, паразумнееце?
Ці ж Той, Хто насадзіў вуха, не пачуе? Або Той, што сфармаваў вока, не ўбачыць?
Ці ж Той, Які вуха стварыў, не пачуе? Ці ж Той, Які вока ўфармаваў, ня ўбачыць?
Ці ж Той, Хто спасцігае народы, не выкрые, Той, Хто вучыць чалавека разуменню?
Ці ж Той, Які навучае народы, ня будзе караць, Той, Які вучыць чалавека ведам?
Госпад ведае думкі людзей, што яны марныя.
ГОСПАД ведае думкі чалавечыя, што яны — марнасьць.
Шчасны той чалавек, якога ўдасканальваеш Ты, Госпадзе, і паводле закону Твайго навучаеш яго,
Шчасьлівы чалавек, якога Ты, ГОСПАДЗЕ, навучаеш і вучыш яго Закону Твайму,
каб даць адпачыць яму ад ліхіх дзён, пакуль выкапаюць магілу для грэшніка.
каб быў ён у супакоі ў дні ліхія, пакуль выкапаны будзе дол для бязбожніка.
Бо не адкіне Госпад свайго народа і не пакіне спадчыны сваёй.
Бо не адкіне ГОСПАД народ Свой, і спадчыну Сваю не пакіне.
Бо суд вернецца да справядлівасці, і пойдуць за ёю ўсе, хто праўдзівага сэрца.
Бо вернецца суд да праведнасьці, і пойдуць за ім усе правыя сэрцам.
Хто стане за мяне супраць ліхадзеяў або хто стане разам са мною супраць тых, што чыняць несправядлівасць?
Хто за мяне супраць злачынцаў паўстане? Хто заступіцца за мяне супраць тых, што робяць злачынства?
Каб Госпад не ўспамог, хутка душа мая апынулася б у краіне маўклівасці.
Калі б ГОСПАД ня быў успамогай мне, хутка душа мая пасялілася б у [месцы] маўчаньня.
Калі гавару я: «Нага мая хістаецца», міласэрнасць Твая, Госпадзе, падтрымлівае мяне.
Калі я сказаў: «Хістаецца нага мая!», міласэрнасьць Твая, ГОСПАДЗЕ, умацавала мяне.
Калі мноства турбот маіх у сэрцы маім, Твае суцяшэнні ўзвесяляюць маю душу.
Калі мноства цяжкіх думак у нутры маім, пацяшэньні Твае падбадзёрваюць душу маю.
Ці ж будзе з Табою сябраваць пасад несправядлівасці, які пад выглядам прыказання творыць пакуту?
Ці ж можа таварышаваць з Табою пасад загубы, які чыніць ліхоцьце супраць пастановы [Тваёй]?
Яны накідваюцца на душу справядлівага і асуджаюць кроў бязвінную.
Яны зьбіраюцца супраць душы праведніка і кроў нявінную асуджаюць.
І стаўся мне Госпад абаронаю і Бог мой — скалою прыстанішча майго;
Але ГОСПАД стаўся ўмацаваным замкам для мяне, і Бог мой — скалой прыстанішча майго.
і аддасць Ён ім іх несправядлівасць і ў ліхадзейнасці іх знішчыць іх. Знішчыць іх Госпад Бог наш.
І зьверне Ён на іх злачынства іхняе, і ў ліхоце іхняй вынішчыць іх; вынішчыць іх ГОСПАД, Бог наш.
