Псалтыр 91 псалом

Псалтыр
Пераклад Чарняўскага 2017 → Пераклад Антонія Бокуна

 
 

Хто жыве ў апецы Найвышэйшага і прабывае ў засені Усемагутнага,
 
Той, які жыве пад заслонай Найвышэйшага і пад ценем Усемагутнага,

кажа ён Госпаду: «Ты прыпынак мой і цвярдыня мая, Божа мой; я маю надзею на Яго».
 
кажа да ГОСПАДА: «Ты — прыстанішча маё і цьвярдыня мая, Бог мой, на Якога я спадзяюся».

Бо Ён Сам вызваліць цябе з пасткі паляўнічых, ад нягоднага слова.
 
Бо Ён выратуе цябе ад пасткі птушкалова, ад пошасьці сьмяротнай.

Агорне Ён цябе Сваімі крыламі, і пад пер’ем Яго схаваешся; шчыт і заслона — праўда Яго.
 
Пер’ем Сваім закрые цябе, і пад крыламі Ягонымі будзеш мець надзею; праўда Ягоная — шчыт і заслона.

Не будзеш баяцца жахаў начных, ані стралы, што ляціць удзень.
 
Не спалохаешся страху ўначы, ані стралы, якая ўдзень ляціць,

Ані заразы, што бадзяецца ў цемры, ані пошасці, што пустошыць апоўдні.
 
ані пошасьці, якая ў цемры прыходзіць, ані заразы, якая сярод белага дня пустошыць.

Хоць падзе пры баку тваім тысяча, а дзесяць тысяч праваруч, ты ўсцеражэшся.
 
Тысяча побач з табой упадзе і дзесяць тысячаў праваруч ад цябе, а да цябе яна не падыйдзе.

Сапраўды, пабачыш на ўласныя вочы, і паглядзіш на адплату грэшнікам.
 
Толькі вачыма тваімі глядзець будзеш і ўбачыш з бязбожнымі расплату.

Бо Ты, Госпадзе, прыстанішча маё, учыніў ты Найвышэйшага паселішчам тваім.
 
За тое, што ты ГОСПАДА, прыбежышча сваё, і Найвышэйшага выбраў за сялібу сабе,

Не падступіцца да цябе ліха і бізун не наблізіцца да палаткі тваёй,
 
не спаткае цябе злое, і пакараньне не наблізіцца да намёту твайго.

бо загадаў Ён анёлам сваім наконт цябе, каб сцераглі цябе на ўсіх тваіх дарогах.
 
Бо Ён анёлам Сваім загадае пра цябе, каб захоўвалі цябе на ўсіх шляхах тваіх.

На руках будуць насіць цябе, каб часам не скалечыў аб камень нагі сваёй.
 
На руках панясуць цябе, каб не спатыкнуўся аб камень нагою тваёю.

На змяю і яшчарку наступіш, ды растопчаш ільва і дракона.
 
Па ільвах і гадзюках хадзіць будзеш, львянятаў і цмокаў патопчаш.

Паколькі прытуліўся ён да Мяне, вызвалю яго; падтрымаю яго, бо спазнаў ён імя Маё.
 
«За тое, што ён Мяне ўзьлюбіў, збаўлю яго; узвышу яго, бо імя Маё ведае.

Будзе клікаць мяне, і Я выслухаю яго, у бядзе Я разам з ім, вырву яго і ўслаўлю яго.
 
Будзе клікаць Мяне, і Я адкажу яму; у бядзе Я буду з ім, выратую яго і ўшаную яго.

Напоўню яго доўгасцю дзён і пакажу яму збаўленне Маё.
 
Доўгімі днямі насычу яго і дам убачыць збаўленьне Маё».