Псалтыр 3 псалом
Псалтыр
Пераклад Чарняўскага 2017 → Пераклад Антонія Бокуна
Псальм Давідаў, калі ўцякаў ад свайго сына Абсалома.
Псальм Давіда, калі ён уцякаў ад аблічча Абсалома, сына свайго.
Божа, як жа многа тых, што непакояць мяне, як шмат бунтуюцца супраць мяне!
ГОСПАДЗЕ, як шматлікія сталі прыгнятальнікі мае! Шмат іх паўстае супраць мяне!
Многія вось кажуць душы маёй: «Няма яму збаўлення ў Богу».
Шмат тых, якія кажуць пра душу маю: «Няма для яго збаўленьня ў Бога». (Сэлях)
Ты ж, Госпадзе, Божа, шчыт мой, хвала мая Ты, галаву падымаеш мне ўверх.
Але Ты, ГОСПАДЗЕ, — шчыт для мяне, Ты — слава мая, і Ты падымаеш галаву маю.
Клічам сваім прызываў я Госпада. І выслухаў Ён мяне з гары Сваёй святой.
Голасам маім я клікаў да ГОСПАДА, і Ён адказаў мне з гары Сваёй сьвятой. (Сэлях)
Я лёг і выспаўся, устаў, бо Госпад ахоўвае мяне.
Я лёг і заснуў, і абудзіўся, бо ГОСПАД падтрымлівае мяне.
Не збаюся і тысячы людзей, што навокал мяне абступілі.
Не палохаюся я многіх тысячаў народу, што абступілі мяне наўкола.
Узніміся, Госпадзе! Ухавай мяне, Божа мой! Бо па шчацэ даў Ты ўсім супраціўнікам маім, павыбіваў Ты зубы грэшнікам.
Паўстань, ГОСПАДЗЕ! Збаў мяне, Божа мой! Бо Ты даў ворагам маім па сківіцах, Ты скрышыў зубы бязбожнікаў.
У Бога бо збаўленне, і дабраславенне Тваё Твайму народу!
У ГОСПАДА збаўленьне і для народу Твайго дабраслаўленьне Тваё. (Сэлях)
