Псалтыр 3 псалом
Псалтыр
Пераклад Чарняўскага 2017 → Пераклад Міхаіла Астапчыка
Псальм Давідаў, калі ўцякаў ад свайго сына Абсалома.
Псалом Давіда, калі ён уцякаў ад Авесалома, сына свайго.
Божа, як жа многа тых, што непакояць мяне, як шмат бунтуюцца супраць мяне!
Божа мой, што ж так памножыліся ворагі мае? Шмат паўстала на мяне.
Многія вось кажуць душы маёй: «Няма яму збаўлення ў Богу».
Шмат кажа да душы маёй: «Бог не ўратуе яго».
Ты ж, Госпадзе, Божа, шчыт мой, хвала мая Ты, галаву падымаеш мне ўверх.
Але Ты, Божа, Збавіцелю мой, слава мая, І ўздымеш дагары галаву маю.
Клічам сваім прызываў я Госпада. І выслухаў Ён мяне з гары Сваёй святой.
Голасам сваім усклічу да Бога, І пачуе мяне ад гары Свае святыя.
Я лёг і выспаўся, устаў, бо Госпад ахоўвае мяне.
Я заснуў і спаў, але прачнуўся І цяпер абараняе мяне Госпад.
Не збаюся і тысячы людзей, што навокал мяне абступілі.
Таму не збаюся процьмы людзей, Што з усіх бакоў абышлi душу маю.
Узніміся, Госпадзе! Ухавай мяне, Божа мой! Бо па шчацэ даў Ты ўсім супраціўнікам маім, павыбіваў Ты зубы грэшнікам.
Паўстані, Божа, і абарані мяне. Ты парушыш зубы грэшных і знішчыш марна варагуючых на мяне.
У Бога бо збаўленне, і дабраславенне Тваё Твайму народу!
Ад Бога збаўленне, І на людзях Тваіх дабраслаўленне Твае.