Псалтыр 3 псалом
Псалтыр
Пераклад Яна Станкевіча → Пераклад Антонія Бокуна
Псальма Давідава, як ён уцякаў ад відзеньня Аўсалома, сына свайго.
Псальм Давіда, калі ён уцякаў ад аблічча Абсалома, сына свайго.
СПАДАРУ! як павялічыліся ўцісканьнікі мае! Шмат хто паўстаець супроці мяне;
ГОСПАДЗЕ, як шматлікія сталі прыгнятальнікі мае! Шмат іх паўстае супраць мяне!
Шмат хто кажа душы маёй: «Няма яму спасеньня ад Бога».
Шмат тых, якія кажуць пра душу маю: «Няма для яго збаўленьня ў Бога». (Сэлях)
А Ты, СПАДАРУ, шчыт імне, слава мая і ўзьніманьнік галавы мае.
Але Ты, ГОСПАДЗЕ, — шчыт для мяне, Ты — слава мая, і Ты падымаеш галаву маю.
Голасам сваім да СПАДАРА я гукаю, і Ён адказуе імне ізь сьвятое гары Свае. Сэля.
Голасам маім я клікаў да ГОСПАДА, і Ён адказаў мне з гары Сваёй сьвятой. (Сэлях)
Я клаўся і спаў, і прачыхаўся, бо СПАДАР падзьдзержуе мяне.
Я лёг і заснуў, і абудзіўся, бо ГОСПАД падтрымлівае мяне.
Не спалохаюся я дзесяцёх тысячаў люду, што наўкола абступілі мяне.
Не палохаюся я многіх тысячаў народу, што абступілі мяне наўкола.
Паўстань, СПАДАРУ! спасі мяне, о Божа мой! бо Ты тнеш усіх непрыяцеляў маіх у шчаку, зубы бязбожным Ты ломіш.
Паўстань, ГОСПАДЗЕ! Збаў мяне, Божа мой! Бо Ты даў ворагам маім па сківіцах, Ты скрышыў зубы бязбожнікаў.
У СПАДАРА спасеньне; дабраславенства Твае над людам Тваім. Сэля.
У ГОСПАДА збаўленьне і для народу Твайго дабраслаўленьне Тваё. (Сэлях)
