Псалтыр 136 псалом
Псалтыр
Пераклад Яна Станкевіча → Пераклад Антонія Бокуна
Дзякуйце СПАДАРУ, бо добры, бо на векі міласэрдзе Ягонае.
Слаўце ГОСПАДА, бо Ён добры, бо на вякі міласэрнасьць Яго!
Дзякуйце Богу багоў, бо на векі міласэрдзе Ягонае.
Слаўце Бога багоў, бо на вякі міласэрнасьць Яго!
Дзякуйце Спадару спадароў, бо на векі міласэрдзе Ягонае;
Слаўце Пана паноў, бо на вякі міласэрнасьць Яго!
Каторы адзіны робе вялікія дзівы, бо на векі міласэрдзе Ягонае;
Таго, Які Сам робіць цуды вялікія, бо на вякі міласэрнасьць Яго:
Таму, хто ўчыніў нябёсы цямлівасьцяй Сваёй, бо на векі міласэрдзе Ягонае;
Таго, Які неба ўчыніў з разуменьнем, бо на вякі міласэрнасьць Яго;
Таму, што прасьцягнуў зямлю над водамі, бо на векі міласэрдзе Ягонае;
Таго, Які зямлю расьцягнуў па-над водамі, бо на вякі міласэрнасьць Яго;
Таму, што ўчыніў вялікія сьветлы, бо на векі міласэрдзе Ягонае;
Таго, Які ўчыніў сьвяцілы вялікія, бо на вякі міласэрнасьць Яго;
Сонца радзіць дзень, бо на векі міласэрдзе Ягонае;
сонца, каб кіравала днём, бо на вякі міласэрнасьць Яго;
Месяц а гвезды радзіць ноч, бо на векі міласэрдзе Ягонае;
месяц і зоркі, каб кіравалі ноччу, бо на вякі міласэрнасьць Яго;
Таму, што зразіў Ягіпет у першакох ягоных, бо на векі міласэрдзе Ягонае;
Таго, Які пабіў Эгіпет у першародных ягоных, бо на вякі міласэрнасьць Яго;
І вывеў Ізраеля з памеж іх, бо на векі міласэрдзе Ягонае;
і вывеў Ізраіля спасярод яго, бо на вякі міласэрнасьць Яго;
Рукою моцнаю і цаўём выцягненым, бо на векі міласэрдзе Ягонае;
рукою дужаю і рамяном узьнятым, бо на вякі міласэрнасьць Яго;
Таму, хто расьцяў на часьці Чырвонае мора, бо на векі міласэрдзе Ягонае;
Таго, Які Мора Чырвонае расьсек, бо на вякі міласэрнасьць Яго;
І правёў Ізраеля пасярод яго, бо на векі міласэрдзе Ягонае;
і правёў Ізраіля пасярод яго, бо на вякі міласэрнасьць Яго;
Але ськінуў фараона а войска ягонае ў Чырвонае мора, бо на векі міласэрдзе Ягонае.
і кінуў фараона і войска ягонае ў Мора Чырвонае, бо на вякі міласэрнасьць Яго;
Таму, што правёў люд Свой пераз пустыню, бо на векі міласэрдзе Ягонае!
Таго, Які вёў народ Свой праз пустыню, бо на вякі міласэрнасьць Яго;
Таму, Каторы зразіў вялікіх каралёў, бо на векі міласэрдзе Ягонае;
Таго, Які пабіў валадароў вялікіх, бо на вякі міласэрнасьць Яго;
І забіў магучых каралёў, бо на векі міласэрдзе Ягонае;
і забіў валадароў слаўных, бо на вякі міласэрнасьць Яго;
Сыгона, караля Аморэйскага, бо на векі міласэрдзе Ягонае;
Сыгона, валадара Амарэйскага, бо на вякі міласэрнасьць Яго;
І Оґа, караля Вашанскага, бо на векі міласэрдзе Ягонае;
і Ога, валадара Башану, бо на вякі міласэрнасьць Яго;
І даў зямлю іхную на спадак, бо на векі міласэрдзе Ягонае;
і аддаў зямлю іхнюю ў спадчыну, бо на вякі міласэрнасьць Яго;
На спадак Ізраелю, слузе Свайму, бо на векі міласэрдзе Ягонае;
у спадчыну Ізраілю, слузе Свайму, бо на вякі міласэрнасьць Яго;
Каторы ў паніжэньню нашым памятаваў нас, бо на векі міласэрдзе Ягонае;
Таго, Які ў паніжэньні нашым успомніў пра нас, бо на вякі міласэрнасьць Яго;
І адкупіў нас ад непрыяцеляў нашых, бо на векі міласэрдзе Ягонае;
і выратаваў нас ад прыгнятальнікаў нашых, бо на вякі міласэрнасьць Яго;
Каторы даець еміну кажнаму целу, бо на векі міласэрдзе Ягонае;
Таго, Які дае хлеб усякаму целу, бо на вякі міласэрнасьць Яго.
Дзякуйце Богу нябёсаў, бо на векі міласэрдзе Ягонае.
Слаўце Бога нябёсаў, бо на вякі міласэрнасьць Яго!
