Псалтыр 118 псалом
Псалтыр
Пераклад Яна Станкевіча → Пераклад Антонія Бокуна
Дзякуйце СПАДАРУ, бо добры, бо на векі міласэрдзе Ягонае.
Слаўце ГОСПАДА, бо Ён добры, бо на вякі міласэрнасьць Ягоная!
Скажы ж, Ізраелю, што на векі міласэрдзе Ягонае;
Няхай скажа Ізраіль, што на вякі міласэрнасьць Ягоная!
Скажыце ж, доме Ааронаў, што на векі міласэрдзе Ягонае;
Няхай скажа дом Аарона, што на вякі міласэрнасьць Ягоная!
Скажыце ж тыя, што баіцеся СПАДАРА, што на векі міласэрдзе Ягонае.
Няхай скажуць тыя, што баяцца ГОСПАДА, што на вякі міласэрнасьць Ягоная!
З-пад гароты свае я пагукаў да ЯГ, і пакволеньням адказаў імне ЯГ.
У муках клікаў я ГОСПАДА, і Ён адказаў мне, Госпад [вывеў мяне] на вольны прастор.
СПАДАР із імною, не баюся: што зробе імне чалавек?
ГОСПАД са мною, я не баюся. Што зробіць мне чалавек?
СПАДАР із імною меж памачнікоў маіх, — і я гляджу на тых, што ненавідзяць мяне.
ГОСПАД са мною, Ён — дапамога мая, і я буду глядзець [на загубу] тых, што мяне ненавідзяць.
Валей уцякаць да СПАДАРА, чымся спадзявацца на чалавека.
Лепш мець надзею на ГОСПАДА, чым спадзявацца на чалавека.
Валей уцякаць да СПАДАРА, чымся спадзявацца на князёў.
Лепш мець надзею на ГОСПАДА, чым спадзявацца на магнатаў.
Усі народы абступілі мяне; імям СПАДАРОВЫМ я зьнішчыў іх.
Усе народы мяне абступілі, але імем ГОСПАДА я перамог іх.
Абступілі мяне, таксама акружылі мяне; але імям СПАДАРОВЫМ я зьнішчыў іх.
Абступілі мяне, абступілі, але імем ГОСПАДА я перамог іх.
Абступілі мяне, як пшчолы; згасьлі, як цяпло зь церняў; імям СПАДАРОВЫМ я зьнішчыў іх.
Абселі мяне, быццам пчолы, і згарэлі яны, як агонь з цярніны, бо імем ГОСПАДА я перамог іх.
Піхнулі мяне, каб я паваліўся; але СПАДАР памог імне.
Пхаючы, папхнулі мяне, каб я ўпаў, але ГОСПАД дапамог мне.
Сіла мая а песьня ЯГ, і стаў імне спасеньням.
ГОСПАД — моц мая і песьня мая, Ён стаўся збаўленьнем маім.
Гук радасьці а спасеньня ў буданох справядлівых: «Правіца СПАДАРОВА робе мужным;
Голас радасьці і збаўленьня — у намётах праведнікаў. Правіца ГОСПАДА зьявіла сілу.
Правіца СПАДАРОВА высокая; правіца СПАДАРОВА робе мужным».
Правіца ГОСПАДА ўзьнесена, правіца ГОСПАДА зьявіла сілу.
Не памру, але буду жыў і буду абяшчаць учынкі ЯГ.
Не памру, але буду жыць і буду абвяшчаць пра дзеяньні ГОСПАДА.
Балюча казьнерыў мяне ЯГ, але на сьмерць не аддаў мяне.
Караючы, пакараў мяне ГОСПАД, але сьмерці мяне не аддаў.
Адчыніце імне брамы справядлівасьці; я ўвыйду ў іх і буду выхваляць ЯГ.
Адчыніце мне брамы праведнасьці; я ўвайду праз іх і буду славіць ГОСПАДА.
Гэта брама СПАДАРОВА; справядлівыя ўвыйдуць ёю.
Вось брама ГОСПАДА; праведнікі ўвойдуць праз яе.
Я буду выхваляць Цябе, бо Ты адказаў імне й стаў спасеньням маім.
Буду славіць Цябе, бо Ты адказаў мне і стаўся збаўленьнем маім!
Камень, адкінены будаўнічымі стаў вугольным.
Камень, які адкінулі будаўнікі, стаўся галавой вугла.
Ад СПАДАРА гэта сталася; чудоснае яно ў вачох нашых.
Ад ГОСПАДА гэта сталася, і [гэта] цуд у вачах нашых!
Гэта тый дзень, каторы ўчыніў СПАДАР; будзем цешыцца а весяліцца ў ім.
Вось дзень, які стварыў ГОСПАД; будзем весяліцца і радавацца ў ім!
Малю, СПАДАРУ! спасі ж, малю, СПАДАРУ, пашчасьці ж!
Прашу, ГОСПАДЗЕ, збаў цяпер! Прашу, ГОСПАДЗЕ, дай посьпех цяпер!
Дабраславёны прыходзячы ў імя СПАДАРОВА. Дабраславім вас із дому СПАДАРОВАГА.
Дабраслаўлёны той, хто прыходзіць у імя ГОСПАДА; мы дабраслаўляем вас з Дому ГОСПАДА.
Бог — СПАДАР, і засьвяціў нам. Прывяжыце сьвяточны аброк паварозам да рагоў аброчніка.
ГОСПАД ёсьць Бог, Ён асьвятліў нас; прывяжыце вяроўкамі сьвяточную [ахвяру] да рагоў ахвярніку!
Ты — Бог мой, і я буду выхваляці Цябе; Бог мой, я ўзьвялічу Цябе.
Ты — Бог мой, Цябе я буду славіць, Цябе, Божа мой, вывышаць!
Дзякуйце СПАДАРУ, бо добры, бо на векі міласэрдзе Ягонае.
Слаўце ГОСПАДА, бо Ён — добры, бо на вякі міласэрнасьць Ягоная!
