Псалтыр 136 псалом
Псалтыр
Пераклад Яна Станкевіча → Пераклад Чарняўскага 2017
Дзякуйце СПАДАРУ, бо добры, бо на векі міласэрдзе Ягонае.
Алілуя. Вызнавайце Госпада, бо Ён добры, бо Яго міласэрнасць вечная.
Дзякуйце Богу багоў, бо на векі міласэрдзе Ягонае.
Вызнавайце Бога над багамі, бо Яго міласэрнасць вечная.
Дзякуйце Спадару спадароў, бо на векі міласэрдзе Ягонае;
Вызнавайце Госпада над валадарамі, бо Яго міласэрнасць вечная.
Каторы адзіны робе вялікія дзівы, бо на векі міласэрдзе Ягонае;
Ён адзін учыніў цуды вялікія, бо Яго міласэрнасць вечная.
Таму, хто ўчыніў нябёсы цямлівасьцяй Сваёй, бо на векі міласэрдзе Ягонае;
Ён стварыў нябёсы прамудра, бо Яго міласэрнасць вечная
Таму, што прасьцягнуў зямлю над водамі, бо на векі міласэрдзе Ягонае;
Ён распасцёр зямлю над водамі, бо Яго міласэрнасць вечная.
Таму, што ўчыніў вялікія сьветлы, бо на векі міласэрдзе Ягонае;
Ён стварыў свяцілы вялікія, бо Яго міласэрнасць вечная;
Сонца радзіць дзень, бо на векі міласэрдзе Ягонае;
сонца, каб днём кіравала, бо Яго міласэрнасць вечная.
Месяц а гвезды радзіць ноч, бо на векі міласэрдзе Ягонае;
месяц і зоры, каб кіравалі ноччу, бо Яго міласэрнасць вечная.
Таму, што зразіў Ягіпет у першакох ягоных, бо на векі міласэрдзе Ягонае;
Ён пабіў Егіпет у першародных яго, бо Яго міласэрнасць вечная.
І вывеў Ізраеля з памеж іх, бо на векі міласэрдзе Ягонае;
Ён вывеў Ізраэля з асяроддзя іх, бо Яго міласэрнасць вечная;
Рукою моцнаю і цаўём выцягненым, бо на векі міласэрдзе Ягонае;
магутнай далонню і шырокай рукою, бо Яго міласэрнасць вечная.
Таму, хто расьцяў на часьці Чырвонае мора, бо на векі міласэрдзе Ягонае;
Ён Чырвонае мора падзяліў на часткі, бо Яго міласэрнасць вечная.
І правёў Ізраеля пасярод яго, бо на векі міласэрдзе Ягонае;
І правёў Ізраэля пасярод яго, бо Яго міласэрнасць вечная.
Але ськінуў фараона а войска ягонае ў Чырвонае мора, бо на векі міласэрдзе Ягонае.
Ён скінуў фараона і сілу яго ў мора, бо Яго міласэрнасць вечная.
Таму, што правёў люд Свой пераз пустыню, бо на векі міласэрдзе Ягонае!
Ён правёў народ Свой праз пустыню, бо Яго міласэрнасць вечная.
Таму, Каторы зразіў вялікіх каралёў, бо на векі міласэрдзе Ягонае;
Ён пабіў цароў вялікіх, бо Яго міласэрнасць вечная.
І забіў магучых каралёў, бо на векі міласэрдзе Ягонае;
Ён пабіў цароў магутных, бо Яго міласэрнасць вечная.
Сыгона, караля Аморэйскага, бо на векі міласэрдзе Ягонае;
Сэгона, цара амарэяў, бо Яго міласэрнасць вечная.
І Оґа, караля Вашанскага, бо на векі міласэрдзе Ягонае;
І Ога, цара Басана, бо Яго міласэрнасць вечная.
І даў зямлю іхную на спадак, бо на векі міласэрдзе Ягонае;
І аддаў зямлю іх у спадчыну, бо Яго міласэрнасць вечная.
На спадак Ізраелю, слузе Свайму, бо на векі міласэрдзе Ягонае;
У спадчыну Ізраэлю, слузе Свайму, бо Яго міласэрнасць вечная.
Каторы ў паніжэньню нашым памятаваў нас, бо на векі міласэрдзе Ягонае;
Ён помніў пра нас у паніжэнні нашым, бо Яго міласэрнасць вечная;
І адкупіў нас ад непрыяцеляў нашых, бо на векі міласэрдзе Ягонае;
і адкупіў нас ад непрыяцеляў нашых, бо Яго міласэрнасць вечная.
Каторы даець еміну кажнаму целу, бо на векі міласэрдзе Ягонае;
Ён дае ежу кожнаму целу, бо Яго міласэрнасць вечная.
Дзякуйце Богу нябёсаў, бо на векі міласэрдзе Ягонае.
Вызнавайце Бога нябеснага, бо Яго міласэрнасць вечная.
