Псалтыр 135 псалом
Псалтыр
Пераклад Яна Станкевіча → Пераклад Чарняўскага 2017
Галілуя. Хваліце імя СПАДАРОВА, хваліце, слугі СПАДАРОВЫ,
Алілуя. Хваліце імя Госпада, хваліце, слугі Госпадавы,
У доме СПАДАРОВЫМ стаячыя, на панадворках дому Бога нашага.
вы, што стаіце ў доме Госпадавым, на дзядзінцы дому Бога нашага.
Галілуя, бо СПАДАР добры; пяіце хвалы імені Ягонаму, бо прыемнае;
Хваліце Госпада, бо Госпад добры; спявайце псальмы імю Яго, бо яно мілае.
Бо Якава абраў Сабе ЯГ, Ізраеля на Сваю апрычоную собскасьць;
Бо Госпад выбраў сабе Якуба, Ізраэля на ўласнасць Сваю.
Бо я ведаю, што вялікі СПАДАР, і Спадар наш над усімі багамі.
Бо я спазнаў, што вялікі Госпад, і Бог наш [вышэйшы] за ўсіх багоў.
Усе, што хоча СПАДАР, тое робе на нябёсах і на зямлі, на морах і ў вусіх бяздоньнях.
Усё, што толькі захоча Госпад, здзейсніць Ён на небе і на зямлі, на моры і ва ўсіх глыбінях вадзяных.
Ён прычыняе, што пары падыймаюцца ад канца зямлі, робе маланьні да дажджу, выводзе вецер із скарбніцаў Сваіх.
Прыганяе хмары з канца зямлі, выклікае дождж маланкамі; выводзіць Ён вятры з клецяў Сваіх.
Ён зразіў першакоў у Ягіпце, ад чалавека аж да статку.
Ён перабіў першынцаў у Егіпце, так людзей, як і жывёлу.
Паслаў знакі а чудосы сярод цябе, Ягіпце, на Фараона а на ўсіх слугаў ягоных.
Паказаў знакі і цуды пасярод цябе, Егіпет, для фараона і для ўсіх слуг яго.
Каторы зразіў шмат народаў і забіў дужых каралёў:
Ён перабіў многа народаў паганскіх і забіў цароў дужых:
Сыгона, караля Аморэйскага, Оґа, караля Вашанскага, і ўсі каралеўствы Канаанскія;
Сэгона, цара амарэяў, і Ога, цара Басана і ўсе царствы Ханаанскія.
І даў зямлю іхную на спадак, на спадак Ізраелю, люду Свайму.
А зямлю іх перадаў на пасяленне, на пасяленне Ізраэлю, Свайму народу.
Імя Твае, СПАДАРУ, на векі; памятка Твая, СПАДАРУ, ад пакаленьня аж да пакаленьня.
Госпадзе, вечнае імя Тваё; памяць пра Цябе — на ўсе пакаленні.
Бо будзе судзіць СПАДАР люд Свой і над слугамі сваімі будзе меці жаласьць.
Бо Госпад апякуецца над народам Сваім і злітуецца над слугамі Сваімі.
Балваны паган срэбныя а залатыя, работа рук людзкіх.
Ідалы паганаў — гэта срэбра і золата, творы рук людскіх:
Вусны ў іх, але ня гукаюць; вочы ў іх, але ня бачаць;
маюць вусны, а не гавораць; маюць вочы, а не бачаць;
Вушы ў іх, але ня ўважаюць, нават няма дыху ў ратох іхных.
маюць вушы, а не чуюць, і няма подыху ў вуснах іх.
Падобныя да іх будуць робячыя іх, кажны, што спадзяецца на іх.
Падобнымі да іх ёсць тыя, што іх робяць, кожны, што спадзяюцца на іх.
Доме Ізраеляў! дабраслаўце СПАДАРА. Доме Ааронаў! дабраслаўце СПАДАРА.
Доме Ізраэля, дабраслаўляйце Госпада; доме Аарона, дабраслаўляйце Госпада;
Доме Леваў! дабраслаўце СПАДАРА. Вы, што баіцеся СПАДАРА! Дабраслаўце СПАДАРА.
доме Леві, дабраслаўляйце Госпада; вы, што шануеце Госпада, дабраслаўляйце Госпада!
Дабраславёны СПАДАР із Сыёну, Каторы жывець, у Ерузаліме. Галілуя!
Дабраславёны Госпад з Сіёна, Які жыве ў Ерузаліме. Алілуя.