Псалтыр 46 псалом
Псалтыр
Пераклад Яна Станкевіча → Пераклад Чарняўскага 2017
Хору. Сыноў Корыных. Подле Аламоф. Песьня.
Кіраўніку хору. Сыноў Корэ. Паводле «Аламот...» Песня.
Бог нам ахарона а сіла, помач у гаротах, вельма адзержаваная.
Бог — наша прыстанішча і магуцце, хуткі памочнік у нягодах.
Затым не баімся, хоць бы адмянілася зямля, і крануліся горы да сэрца мораў.
Таму не пабаімся, калі б зямля захісталася і горы перанесліся ў сэрца мора.
Шумяць, муцяцца воды Ягоныя, хай дрыжаць горы ад вялічча Ягонага. Сэля.
Хай шумяць і ўздымаюцца яго воды, дрыжаць горы, здрыгануцца горы ў хваляванні Яго.
Рэчныя плыні вяселяць места Божае, сьвятую сялібу Навышняга.
Воды ракі радуюць горад Божы, святы прыпынак Найвышэйшага.
Бог пасярод яе, яна не пахісьнецца: паможа ёй Бог золкам.
Бог знаходзіцца ў ім, і ён не пахіснецца. Бог дапаможа яму на світанні.
Шумяць народы, захісталіся гаспадарствы: Ён выдаў голас Свой, зямля тае.
Узбурыліся народы, захісталіся царствы; падаў Ён голас Свой — расцяклася зямля.
СПАДАР войскаў із намі, Бог Якаваў горад нам. Сэля.
Госпад магуццяў з намі, прыстанішча наша — Бог Якубаў.
Прыходзьце, аглядайце справы СПАДАРОВЫ, якія Ён учыніў спустошаньні на зямлі,
Прыходзьце і пабачце справы Божыя, якія дзівосы чыніць Ён на зямлі.
Суймае войны да канца зямлі, ломе лук і трысьце дзіду, пале цялежкі цяплом.
Ён спыняе войны аж па край зямлі. Ён трэ лукі і ламае зброю, а шчыты паліць агнём.
«Паквольце й ведайце, што Я Бог. Я ўзьвялічаны меж народаў, Я ўзьвялічаны на зямлі!»
Спачніце і паглядзіце, што Я — Бог: буду ўзнесены Я між народамі і буду ўзнесены Я на зямлі.
СПАДАР войскаў із намі, Бог Якаваў горад нам. Сэля.
Госпад магуццяў з намі, прыстанішча наша — Бог Якубаў.