Псалтыр 63 псалом

Псалтыр
Пераклад Яна Станкевіча → Пераклад Чарняўскага 2017

 
 

Псальма Давідава, як ён быў на пустыні Юдэйскай.
 
Псальм Давідаў. Калі быў ён у пустыні Юдэйскай.

Божа! Бог мой Ты. Цябе я золкам шукаю; сьмягне Цябе душа мая, тужа па Табе цела мае, як у сухой, высіляючай зямлі, без вады.
 
Божа, Ты — мой Бог, перад Табою я чуваю ад світання. Сасмягла па Табе душа мая, Цябе запатрабавала цела маё ў зямлі пустыннай, ссохлай і бязводнай.

Гэтак у сьвятыні я сузіраў Цябе, каб бачыць сілу Тваю а чэсьць Тваю;
 
У святыні адкрыў я Цябе, каб убачыць магуцце Тваё і славу Тваю.

Бо лепшая ласка Твая за жыццё, мае вусны будуць выхваляць Цябе;
 
Бо міласэрнасць Твая лепшая за жыццё. Вусны мае будуць хваліць Цябе.

Так я буду дабраславіць Цябе ў жыцьцю сваім; у імя Твае ўзьніму рукі свае.
 
У жыцці маім дабраслаўляю Цябе, у імя Тваё падымаю я рукі мае.

Як шпікам а тукам сыціцца душа мая, радаснымі вуснамі выхваляе Цябе рот мой,
 
Быццам тукам і маслам алівы, насыціцца душа мая, і голасам радасці хваліць будуць вусны мае.

як я думаю празь Цябе на пасьцелі сваёй, на ночных вартах размышляю празь Цябе;
 
Буду помніць я Цябе на пасцелі маёй, і на золку буду разважаць пра Цябе.

Бо Ты быў на помач імне, і ў сьценю крылаў Тваіх я пяю.
 
бо Ты — Успаможца мой, і пад покрывам крылаў Тваіх я радуюся.

Прыліпла душа мая да Цябе; правіца Твая падпірае мяне.
 
Прытулілася да Цябе душа мая, правіца Твая падтрымлівае мяне.

Але тыя, што шукаюць зьнішчыць жыцьцё мае, пойдуць у споднія месцы зямлі;
 
А тыя, што будуць шукаць пагібелі для душы маёй, сыдуць у апраметныя зямлі,

Будуць сьцяты мячом, будуць здабыткам лісоў.
 
хай загінуць яны ад мяча, пажывай лісаў будуць.

А кароль будзе цешыцца ў Богу, пахваляцца ўсі прысягаючыя Ім, бо заткнёныя будуць раты манюкаў.
 
А цар узвесяліцца ў Богу; праслаўлены будуць усе, хто прысягнуў Яму, бо закрыліся вусны тых, хто прамаўляе несправядліва.