Псалтыр 34 псалом

Псалтыр
Пераклад Яна Станкевіча → Пераклад Чарняўскага 2017

 
 

Давідава, як ён адмяніў свой паступак перед Авімелехам, і гэты выгнаў яго, і ён пашоў.
 
Давідаў. Калі ўдаваў сябе за змяшанага ў розуме перад Абімэлехам і пайшоў, выгнаны ім.

Буду дабраславіць СПАДАРА ў кажным часе; штачасна хвала Яго ў вуснах маіх.
 
АЛЕФ. Буду дабраслаўляць Госпада ўвесь час, хвала Яго заўсёды ў маіх вуснах.

СПАДАРОМ хваліцца душа мая; хай чуюць лагодныя й вяселяцца.
 
БЭТ. Госпадам будзе выхваляцца душа мая, хай чуюць [гэта] пакорлівыя і хай радуюцца.

Узьвялічайце СПАДАРА з імною, узвышайма імя Ягонае разам.
 
ГІМЭЛЬ. Узвялічвайце Госпада са мною і давайце ўзнясём імя Яго ўсе разам.

Я шукаў СПАДАРА, і Ён адказаў імне, і ад усіх страхаў маіх выбавіў мяне.
 
ДАЛЕТ. Пачаў я шукаць Госпада, і Ён выслухаў мяне і вырваў Ён мяне з усіх трывог маіх.

Углядаліся ў Яго й сьвятлелі, віды іхныя не засароміліся.
 
ГЭ. Зірніце на Яго — і прасвятлееце, і твары вашыя не засаромеюцца.

Гэты ўбогі пагукаў, і СПАДАР пачуў, і выбавіў яго ад усіх немарасьцяў ягоных.
 
ДЗАЙН. Вось убогі ўсклікнуў, і Госпад выслухаў яго, і з усіх бед выратаваў яго.

Як на вайне, кладзецца Ангіл СПАДАРОЎ навокал тых, што баяцца Яго, і выбаўляе іх.
 
ГЭТ. Анёл Госпадаў абароніць усіх тых навокал, што баяцца Яго, і вырве іх.

Спрабуйце а абачча, што добры СПАДАР! Шчасьлівая людзіна, што спадзяецца на Яго.
 
ТЭТ. Пакаштуйце і паглядзіце, які салодкі Госпад; шчасны чалавек, які ўсклаў надзею на Яго.

Бойцеся СПАДАРА, сьвятыя Ягоныя, бо няма нястачы тым, што баяцца Яго,
 
ЁД. Бойцеся Госпада, святыя Яго, бо няма нястачы для тых, што баяцца Яго.

Левяняты дазнаюць нястачы а голаду, але шукаючым СПАДАРА ня будзе не ставаць ніякага дабра.
 
КАФ. Багатыя збяднелі і пачалі галадаць, а вось тыя, што шукалі Госпада, не будуць мець нястачы ні ў чым добрым.

Пайдзіце, сынове, паслухайце мяне, боязьні СПАДАРА буду ўчыць вас.
 
ЛЯМЭД. Хадзіце, сыны, слухайце мяне: навучу я вас пашане да Бога.

Каторы муж жадае жыцьця й любе дні, каб бачыць дабро,
 
МЭМ. Што гэта за чалавек, які хоча жыць, шануе дзень, каб пабачыць добрае?

Узьдзержуй язык свой ад благога і вусны свае ад гуканьня ашукі;
 
НУН. Утрымлівай язык свой ад ліха і вусны твае хай не гавораць падступна.

Адхініся ад благога й рабі дабро; шукай супакою й жаніся за ім.
 
САМЭК. Адступіся ад ліха і чыні дабро, шукай спакою і імкніся да яго,

Вочы СПАДАРОВЫ на справядлівых, і вушы Ягоныя на гуканьне іхнае.
 
АЙН. бо вочы Госпада — да справядлівых, і вушы Яго — да просьбаў іх.

Від СПАДАРОЎ супроці ліхадзеяў, каб выгубіць ізь зямлі памятку іх.
 
ФЭ. Але аблічча Госпада супраць тых, што чыняць ліха, каб сцерці з зямлі і памяць аб іх.

Галасілі, і СПАДАР чуў, і ад усіх бедаў іхных вывальніў іх.
 
САДЭ. [Справядлівыя] паклікалі — і Госпад выслухаў, і вызваліў іх ад усіх бед іх.

СПАДАР блізка да патрышчаных сэрцам і прыбітых духам выбаўляе.
 
КОФ. Блізкі Госпад да тых, што спакутаваны сэрцам, і пакораных духам Ён уратуе.

Шмат бяды ў справядлівага, але з усіх іх вывальняе яго СПАДАР.
 
РЭС. Многа бед у справядлівых, але з усіх іх уратуе іх Госпад.

Ён сьцеражэць усі косьці ягоныя, ні водная зь іх ня зломіцца.
 
СІН. Сцеражэ Ён усе косці іх, не зломіцца ні адна з іх.

Заб’ець нягоднага ліха, і ненавідзячыя справядлівага будуць вінны.
 
ТАЎ. Крывадушнасць знішчыць грэшніка, і тыя, што ўзненавідзелі справядлівага, будуць пакараныя.

Выкупляе СПАДАР душу слугаў Сваіх, і ня будуць вінны ўсі, што спадзяюцца на Яго.
 
ФЭ. Госпад адкупіць душы паслугачоў сваіх, і не будуць пакараныя ўсе тыя, што пакладаюць і Ім надзею.