Псалтыр 86 псалом

Псалтыр
Пераклад Яна Станкевіча → Пераклад Чарняўскага 2017

 
 

Малітва Давідава. Нахіні, СПАДАРУ, вуха Свае, адкажы імне, бо я ўбогі а бедны.
 
Просьба. Давідаў. Нахіні, Госпадзе, вуха Тваё і выслухай мяне, бо ўбогі я і бедны.

Захавай душу маю, бо я дабрачэсьлівы; Ты, Божа мой, выбаві слугу Свайго, каторы спадзяецца на Цябе.
 
Сцеражы душу маю, бо я цнатлівы, збаў слугу Твайго, Божа мой, які ўскладае надзею на Цябе.

Зьмілуйся над імною, Спадару, бо я гукаю да Цябе ўвесь дзень.
 
Злітуйся нада мной, Госпадзе, бо да Цябе ўсклікаў я цэлы дзень.

Пацеш душу слугі Свайго, бо да Цябе, СПАДАРУ, я падыймаю душу сваю,
 
Узвесялі душу Твайго слугі, бо да Цябе, Госпадзе, узвысіў я душу маю.

Бо Ты, Спадару, добры а выбачны а багаты ласкаю да ўсіх гукаючых Цябе.
 
Бо Ты ж, Госпадзе, добры і ласкавы, і вялікая міласэрнасць [Твая] да ўсіх, што прызываюць Цябе.

Пачуй, СПАДАРУ, малітву маю і ўважай на голас маленьня майго.
 
Успрымі вушамі, Госпадзе, малітву маю і звярні ўвагу на голас малення майго.

У дзень уціску свайго я буду гукаць Цябе, бо Ты адкажаш імне.
 
У дзень бяды маёй клічу я Цябе, бо ведаю, што Ты выслухаеш мяне.

Памеж багоў нямаш падобнага да Цябе, Спадару, ані справаў таковых, як Твае.
 
Няма Табе, Госпадзе, роўнага між багоў і няма нічога [такога ж], як справы Твае.

Усі народы, каторыя Ты ўчыніў, прыйдуць, і паклоняцца Табе, Спадару, і будуць сьціць імя Твае;
 
Прыйдуць усе народы, якія Ты стварыў, і паклоняцца Табе, Госпадзе, і славіць будуць яны Тваё імя.

Бо Ты вялікі й робіш чудосы; Ты Бог адзіны.
 
Бо вялікі Ты і творыш цуды. Ты толькі адзін Бог.

Наўчы мяне дарогі Свае, СПАДАРУ, я буду хадзіць у праўдзе Тваёй; прыхіні сэрца мае баяцца імені Твайго.
 
Навучы мяне, Госпадзе, шляху Твайму, і буду хадзіць я ў праўдзе Тваёй; зрабі шчырым сэрца маё, каб шанавала яно імя Тваё.

Буду хваліць Цябе, Спадару, Божа мой, усім сэрцам сваім і буду сьціць імя Твае на векі;
 
Буду вызнаваць Цябе, Госпадзе, усім сэрцам маім і буду вечна праслаўляць імя Тваё,

Бо ласка Твая вялікая над імною, і Ты выбавіў душу маю ад ніжшага шэолю.
 
бо міласэрнасць Твая да мяне вялікая і вырваў Ты душу маю з пекла апраметнага.

Божа, гордыя паўсталі на мяне, і зборы страшных шукаюць душы мае, і не становяць Цябе перад сабою.
 
Божа, пыхліўцы паўсталі супраць мяне, і зграя моцных шукае душу маю; і не паставілі яны Цябе перад сабою.

Але Ты, Спадару, Бог спагадлівы а ласкучынюшчы, памалы да гневу а вельмі міласэрны а праўдзівы.
 
А Ты, Госпадзе, Бог міласэрны і літасцівы, і цярплівы, вялікай спагаднасці і праўды,

Зьвярні відзеньне Свае да мяне і май міласэрдзе над імною, дай сілу слузе Свайму і выбаві сына служэбкі Свае.
 
глянь на мяне і злітуйся нада мною, дай сілу Тваю слузе Твайму і збаў сына служанкі Сваёй.

Зрабі імне знак на дабро, і абачаць ненавідзячыя мяне і засаромяцца, бо Ты, СПАДАРУ, памог імне й пацешыў мяне.
 
Учыні са мною знак на дабро, каб убачылі тыя, што ненавідзяць мяне, і пасаромеліся, бо Ты, Госпадзе, дапамог мне і пацешыў мяне.