Псалтыр 94 псалом

Псалтыр
Пераклад Яна Станкевіча → Пераклад Чарняўскага 2017

 
 

Божа помсты, СПАДАРУ, Божа помсты, зьявіся!
 
Бог помстаў, Госпадзе! Божа, Бог помстаў, заззяй!

Узьніміся, судзьдзя зямлі, аддай заплату гордым.
 
Узвысся Ты, што судзіш зямлю, аддай заплату пыхлівым.

СПАДАРУ, пакуль нягодным, пакуль нягодным вяльмувацца?
 
Дакуль жа бязбожнікі, Госпадзе, дакуль жа бязбожнікі будуць задавацца?

Верашчэць, гукаць пыхата? усім, бяспраўе дзеючым, вяльмувацца?
 
Будуць вымаўляць і прамаўляць нахабствы, будуць выхваляцца ўсе тыя, што чыняць несправядлівасць?

Люд Твой, СПАДАРУ, яны мяжджуляць і спадак Твой уціскаюць;
 
Прыніжаюць яны, Госпадзе, народ Твой, прыгнятаюць спадчыну Тваю.

Удаве а чужаземцу робяць сьмерць, і сіроты забіваюць,
 
Удаву і прыхадня забіваюць і сірот мардуюць.

І кажуць: «ЯГ не абача, і не зразумее Бог Якаваў».
 
І кажуць яны: «Не бачыць Госпад, не разумее Бог Якубаў».

Зразумейце, недасьціпныя памеж люду, і дурныя, калі вы паразумнееце?
 
Зразумейце, неразумныя ў народзе, бязглуздыя, калі паразумнееце?

Ці Тый, што ўсадзіў вуха, не пачуе? Тый, што ўхармаваў вока, не абача?
 
Ці ж Той, Хто насадзіў вуха, не пачуе? Або Той, што сфармаваў вока, не ўбачыць?

Ці Тый, што зырыў паган, ня будзе ўпікаць, Тый, што вуча чалавека веданьня?
 
Ці ж Той, Хто спасцігае народы, не выкрые, Той, Хто вучыць чалавека разуменню?

СПАДАР ведае думкі чалавека, што яны пустыя.
 
Госпад ведае думкі людзей, што яны марныя.

Дабраславёны муж, каторага казьнера ЯГ і права Свайго навучае яго,
 
Шчасны той чалавек, якога ўдасканальваеш Ты, Госпадзе, і паводле закону Твайго навучаеш яго,

Каб супакоіць яго ў дні нягоды, пакуль выкапаюць дол нягоднаму.
 
каб даць адпачыць яму ад ліхіх дзён, пакуль выкапаюць магілу для грэшніка.

Бо СПАДАР не адкіне люду Свайго і спадку Свайго не пакіне;
 
Бо не адкіне Госпад свайго народа і не пакіне спадчыны сваёй.

Але суд зьвернецца да справядлівасьці, і ўсі пасьцівага сэрца будуць за ім.
 
Бо суд вернецца да справядлівасці, і пойдуць за ёю ўсе, хто праўдзівага сэрца.

Хто пастаіць за мяне на ліхадзеяў? хто стане за мяне на дзеючых бяспраўе?
 
Хто стане за мяне супраць ліхадзеяў або хто стане разам са мною супраць тых, што чыняць несправядлівасць?

Калі б не СПАДАР быў імне памачніком, душа мая траха перабывала б у маўчаньню.
 
Каб Госпад не ўспамог, хутка душа мая апынулася б у краіне маўклівасці.

Як я казаў: «Мая нага коўзаецца», ласка Твая, СПАДАРУ, падперла мяне.
 
Калі гавару я: «Нага мая хістаецца», міласэрнасць Твая, Госпадзе, падтрымлівае мяне.

У множасьці журлівых думак у імне пацехі Твае даюць прыемнасьць душы маёй.
 
Калі мноства турбот маіх у сэрцы маім, Твае суцяшэнні ўзвесяляюць маю душу.

Ці прыязьньства з Табою мае мець седава бяспраўя, каторае крыўды тарнуе да права?
 
Ці ж будзе з Табою сябраваць пасад несправядлівасці, які пад выглядам прыказання творыць пакуту?

Яны зьбіраюцца на душу справядлівага й вінуюць кроў нявінную.
 
Яны накідваюцца на душу справядлівага і асуджаюць кроў бязвінную.

І быў СПАДАР імне горадам, і Бог мой скалаю прытулішча майго;
 
І стаўся мне Госпад абаронаю і Бог мой — скалою прыстанішча майго;

І Ён паверне на іх бяспраўе іхнае, і ў нягоднасьці іхнай адатнець іх, адатнець іх СПАДАР, Бог наш.
 
і аддасць Ён ім іх несправядлівасць і ў ліхадзейнасці іх знішчыць іх. Знішчыць іх Госпад Бог наш.