Псалтыр 103 псалом
Псалтыр
Пераклад Яна Станкевіча → Пераклад Чарняўскага 2017
Давідава. Дабраслаў, душа мая, СПАДАРА, і ўвесь нутр мой — сьвятое імя Ягонае;
Давідаў. Дабраславі, душа мая, Госпада, і ўсё, што ёсць ува мне, — імя святое Яго.
Дабраслаў, душа мая, СПАДАРА і не забудзься ўсіх дабрадзействаў Ягоных;
Дабраславі, душа мая, Госпада ды не забывай пра ўсе даброцці Яго.
Каторы даруе ўсі бяспраўі твае, Каторы леча ўсі хваробы твае,
Ён адпускае ўсе твае правіннасці, Ён лечыць усе кволасці твае.
Каторы адкупляе жыцьцё твае ад зьнішчэньня, Каторы карануе цябе ласкаю а спагадлівасьцяй,
Ён адкупае душу тваю ад загубы, Ён вянчае цябе міласэрнасцю і літасцю;
Каторы сыце дабром век твой і, як арліную, аднаўляе маладосьць тваю.
Ён напаўняе дабротамі пры жыцці цябе, аднаўляецца, як у арла, маладосць твая.
Дзее справядлівасьць СПАДАР і суды ўсім уцісьненым.
Госпад, што чыніць справядлівасць і суд для ўсіх, хто церпіць крыўду,
Ён паведаміў Масею дарогі Свае, сыном Ізраеля — учынкі Свае.
Ён даў Майсею спазнаць шляхі Свае, сынам Ізраэля — справы Свае.
СПАДАР спагадлівы а ласкучынюшчы, памальны да гневу а вельмі міласэрны;
Літасцівы і спагадны Госпад, доўгацярплівы і вельмі міласэрны.
Ня будзе заўсёды гневацца ані сердаваць вечна.
Не бясконца Ён сварыцца ды не вечна будзе гневацца.
Ня подле грахоў нашых зрабіў нам ані подле бяспраўяў вашых адплаціў нам;
Не адгаджае нам паводле грахоў нашых і не помсціць нам за правіннасці нашыя.
Бо як высака неба над зямлёю, так дужая ласка Ягоная да тых, што баяцца Яго.
Бо, наколькі ўзвышаецца неба над зямлёю, настолькі перавышае міласэрнасць Яго страх Яго.
Як далёкі ўсход ад захаду, так здаліў ад нас выступы нашы.
Як далёкі ўсход ад захаду, так аддаляе Ён ад нас грахі нашы.
Як айцец спагадае дзяцём, спагадае СПАДАР тым, што баяцца Яго;
Як бацька літуецца над сынамі, так Госпад злітаваўся над тымі, што шануюць Яго.
Бо Ён ведае ўхармаваньне нашае, помне, што пыл мы.
Бо Ён спазнаў стварэнне наша, успомніў, што мы — пыл.
Людзіна — як трава, дні ейныя; як кветка палявая, так яна квіціць;
Быццам трава дні людскія, чалавек цвіце, як краска палявая,
Бо павее вецер на яе, і яе няма, і месца ейнага не пазнаюць.
ледзь павее на яе вецер, і ўжо няма яе, і месца яе невядомае.
Але міласэрдзе СПАДАРОВА ад веку да веку да тых, што баяцца Яго, і справядлівасьць Ягоная да сыноў сыноў,
А міласэрнасць жа Госпадава спрадвеку па век над тымі, што шануюць Яго, а справядлівасць Яго — для сыноў сынавых.
Да такіх, што дзяржаць змову Ягоную, і да тых, што памятуюць прызначаньні Ягоныя, каб паўніць іх.
Для тых, якія трымаюцца запавету Яго і памятаюць прыказанні Яго, каб спаўняць іх.
СПАДАР на нябёсах прыгатаваў пасад Свой, і гаспадарства Ягонае ўсе радзе.
Госпад у небе падрыхтаваў пасад Свой, і валадарыць Ён над усім светам.
Дабраслаўце СПАДАРА, ангілы Ягоныя, дужыя сілаю, поўнячыя слова Ягонае, каб слухаць гуку слова Ягонага!
Дабраслаўляйце Госпада, усе анёлы Яго, моцныя магуццем, робячы па слове Яго на паслухмянасць голасу мовы Яго.
Дабраслаўце СПАДАРА, усі войскі Ягоныя, службіты Ягоныя, што поўніце волю Ягоную!
Дабраслаўляйце Госпада, усе магуцці Яго, слугі Яго, якія выконваеце волю Яго.
Дабраслаўце СПАДАРА, усі творы Ягоныя, на ўсіх месцах дзяржавы Ягонае! Дабраслаў, душа мая, СПАДАРА!
Дабраслаўляйце Госпада, усе справы Яго, і ў кожным месцы Яго валадарання дабраславі, душа мая, Госпада!