Псалтыр 103 псалом
Псалтыр
Пераклад Л. Дзекуць-Малея → Пераклад Чарняўскага 2017
Псальм Давідавы.Багаслаў, душа мая, Госпада, і ўсё нутро маё — імя Яго сьвятое!
Давідаў. Дабраславі, душа мая, Госпада, і ўсё, што ёсць ува мне, — імя святое Яго.
Багаслаў, душа мая, Госпада і не забывайся аб тым, што Ён табе зрабіў!
Дабраславі, душа мая, Госпада ды не забывай пра ўсе даброцці Яго.
Ён, Каторы дароўвуе табе ўсе грахі тваі, вылечвае ўсякую немач тваю,
Ён адпускае ўсе твае правіннасці, Ён лечыць усе кволасці твае.
Каторы жыцьцё тваё ад магілы спасае, ласкай і міласэрдзем вянчае цябе,
Ён адкупае душу тваю ад загубы, Ён вянчае цябе міласэрнасцю і літасцю;
Каторы тваю старасьць дабром насычае, тваю моладасьць, як у арла, аднаўляе.
Ён напаўняе дабротамі пры жыцці цябе, аднаўляецца, як у арла, маладосць твая.
Справядлівасьць робіць Госпад і суд для ўсіх прыгнечаных.
Госпад, што чыніць справядлівасць і суд для ўсіх, хто церпіць крыўду,
Ён паказаў шляхі Свае Майсею, сыном Ізраілявым учынкі Сваі.
Ён даў Майсею спазнаць шляхі Свае, сынам Ізраэля — справы Свае.
Міласэрны Госпад і добры, да гневу няскоры й шчодры на ласку.
Літасцівы і спагадны Госпад, доўгацярплівы і вельмі міласэрны.
Не назаўсёды Ён гневам палае і не навекі помніць ліхое.
Не бясконца Ён сварыцца ды не вечна будзе гневацца.
Ня водле грахоў нашых нам Ён дае і не адплачвае па правіннасьцям нашым,
Не адгаджае нам паводле грахоў нашых і не помсціць нам за правіннасці нашыя.
але, як высака неба над зямлёю, так вяліка ласка Яго дзеля тых, што баяцца Яго.
Бо, наколькі ўзвышаецца неба над зямлёю, настолькі перавышае міласэрнасць Яго страх Яго.
Як далёкі ад захаду ўсход, так далёка Ён нашы праступкі ад нас аддаліў.
Як далёкі ўсход ад захаду, так аддаляе Ён ад нас грахі нашы.
Як літуецца бацька над дзяцьмі, гэтак Госпад літуецца над тымі, што баяцца Яго.
Як бацька літуецца над сынамі, так Госпад злітаваўся над тымі, што шануюць Яго.
Бо ведае Ён, з чаго зьлеплены мы, памятае, што мы — толькі пыл.
Бо Ён спазнаў стварэнне наша, успомніў, што мы — пыл.
Чалавек — як трава, яго дні; як краска ў полі, так ён цьвіце.
Быццам трава дні людскія, чалавек цвіце, як краска палявая,
Праляціць подмух ветру, і няма ўжо яго, і ўжо месца ягонае не пазнае яго.
ледзь павее на яе вецер, і ўжо няма яе, і месца яе невядомае.
Але ласка Гасподня ад веку й да веку над тымі, што баяцца Яго, і справядлівасьць Ягоная над сынамі сыноў
А міласэрнасць жа Госпадава спрадвеку па век над тымі, што шануюць Яго, а справядлівасць Яго — для сыноў сынавых.
тых, што хаваюць запавет Яго ды закон Яго памятаюць, каб спаўняці яго.
Для тых, якія трымаюцца запавету Яго і памятаюць прыказанні Яго, каб спаўняць іх.
Госпад паставіў пасад Свой на нябёсах, і царства Ягонае над усім пануе.
Госпад у небе падрыхтаваў пасад Свой, і валадарыць Ён над усім светам.
Багаслаўце Госпада вы, Ангелы Яго, вы, волаты сільныя, што загады Яго выпаўняеце, пакорныя голасу слова Ягонага!
Дабраслаўляйце Госпада, усе анёлы Яго, моцныя магуццем, робячы па слове Яго на паслухмянасць голасу мовы Яго.
Багаслаўце Госпада ўсе войскі Ягоныя, слугі Яго, што волю Яго выпаўняеце!
Дабраслаўляйце Госпада, усе магуцці Яго, слугі Яго, якія выконваеце волю Яго.
Багаслаўце Госпада ўсе творы Ягоныя па ўсіх месцах валадарства Яго! Багаслаў Госпада ты, мая душа!
Дабраслаўляйце Госпада, усе справы Яго, і ў кожным месцы Яго валадарання дабраславі, душа мая, Госпада!