Псалтыр 72 псалом
Псалтыр
Пераклад Л. Дзекуць-Малея → Пераклад Чарняўскага 2017
Аб Салямоне. Псальм Давідавы. Божа, дай суд Твой цару й справядлівасьць Тваю сыну цараваму,
Пра Саламона. Давідаў. Божа, суд Твой перадай цару і справядлівасць Тваю сыну царскаму.
каб судзіў народ Твой паводле справядлівасьці і ўбогіх Тваіх водле права,
Хай валадарыць па справядлівасці над народам Тваім, а над убогімі Тваімі па законе.
каб прынесьлі горы супакой народу і ўзгоркі — справядлівасьць,
Хай горы прынясуць мір для народа, а ўзгоркі — справядлівасць.
каб ён людзям убогім даваў справядлівасьць, памагаў-бы дзецям гарапашнікаў ды скрышыў гвалтаўнікоў.
Ён судзіць будзе жабракоў народа і збавіць сыноў убогага і ўпакорыць паклёпніка.
Няхай мецімуць страх прад Табой з роду ў род, пакуль будзе сонца ды месяц.
Будзе жыць ён разам з сонцам і пакуль свеціць месяц у пакаленні і пакаленні.
Хай зыходзе, як дождж на луку сьвежаскошаную, як кроплі дажджовыя, што зямля ад іх вільгатнее.
Сыдзе ён, быццам дождж на траву і быццам залева, што абвадняе зямлю.
Хай пабожны ў яго дні з-красуе, і супакой запануе, пакуль месяц ня спыніцца.
У днях яго зацвіце справядлівасць і паўната спакою, пакуль не пагасне месяц.
І няхай ён пануе ад мора да мора і ад ракі аж да краю зямлі.
будзе валадарыць ад мора аж да мора і ад ракі аж да ўскрайкаў сусвету.
Калені прад ім схіляць будуць праціўнікі, а ворагі ягоныя лізацімуць пыл.
Перад ім будуць падаць жыхары пустыні, і непрыяцелі яго лізаць будуць зямлю.
Цары Тарсу й астравоў дары яму панясуць; цары Арабіі й Сабы прынясуць яму даніну.
Цары Тарсіса і вострава прынясуць дары, цары Арабаў і Сабы дашлюць яму падарункі.
І ўсе цары будуць яму пакланяцца, усе народы яму служыць будуць.
І паклоняцца яму ўсе цары, і ўсе народы служыць яму будуць.
Бо ён ратуе ўбогага, які помачы кліча, і ўцісьнёнага й тога, што ўспамогі ніякай ня мае.
Бо ён вызваліць убогага, які прызывае яго, і беднага, у якога не было ўспаможцы.
Над мізэрным і ўбогім літуецца ён і спасае душу бедакоў.
Пашкадуе ён беднага і ўбогага, і душы бедных ён уратуе.
З уціску й гвалту вызваляе іх душы, і ў вачох яго кроў іх мае цану.
Уратуе ён душы іх ад прыгнёту і гвалту, і кроў іх дарагая будзе для яго.
І будзе ён жыць, і даваць яму будуць з Арабіі золата; будуць маліцца ўсьцяж за яго, багаслаўляць што-дня будуць.
Дык будзе жыць ён, і дадуць яму ад золата Арабіі, і будуць маліцца за яго заўсёды; цэлы дзень дабраслаўляць будуць яго.
Будзе дастатак збожжа ў зямлі, на горных вяршынах; каласы яго будуць шумець, як Ліван, і па местах размножацца людзі, быццам зельле у полі.
І будзе дастатак хлеба на зямлі, закалышацца ён на вяршынях гор; быццам Лібан, плод яго, і расквітнее [насельніцтва] гарадоў, быццам трава зямлі.
Навекі ўхаваецца імя ягонае, пакуль сонца будзе трываці. Багаслаўлены будуць у ім усе плямёны, будуць славіць яго ўсе народы.
Хай будзе дабраславёна імя яго вечна, пакуль [свеціць] сонца, будзе жыць імя яго. І будуць дабраславёныя ў ім усе пакаленні зямныя, усе народы ўзвялічаць яго.
Няхай будзе пахвалены Госпад, Бог Ізраіляў, што Сам Сабой робіць цуды.
Дабраславёны Госпад Бог, Бог Ізраэля, Які сам адзін творыць цуды.
І імя Яго слаўнае хай будзе хвалёна навекі, і ўсе землі хай поўняцца славай Яго! Амін! Амін!
І дабраславёнае імя велічнасці Яго навечна; і напоўніцца велічнасцю Яго ўся зямля. Хай будзе так, хай будзе!
Канец малітвам Давіда, сына Ясьсейвага.
Скончыліся малітвы Давіда, сына Ясэева.