Псалтыр 8 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Кіраўніку хору: на Гацкі лад. Псальм Давідавы.
 
Кіраўніку хору. На мелодыю песні “Выціскальні...” Псальм Давідаў.

Госпадзе, Валадару наш! Як узьвялічана імя Тваё па ўсёй зямлі! Слава Твая ўзьняслася панад нябёсы!
 
Госпадзе, Госпад наш, якое ж дзівоснае імя Тваё па ўсёй зямлі, бо слава Твая ўзнялася вышэй нябёсаў.

Праз вусны дзетак, малых і пры грудзёх, збудаваў Ты апору супраць ворагаў Тваіх, каб замаўчалі ворагі і мсьціцелі.
 
Праз вусны дзяцей і немаўлят учыніў Ты хвалу дзеля ворагаў Тваіх, каб утаймаваць ворага і мсціўцу.

Углядаючыся на неба Тваё, твор пальцаў Тваіх, на месяц ды на зоркі, што Ты панастаўляў.
 
Калі бачу нябёсы Твае, твор пальцаў Тваіх, месяц і зоркі, якія Ты заснаваў, —

я думаю: што ёсьць чалавек, што Ты памятаеш аб ім, і сын чалавечы, што Ты даведываешся яго?
 
то што ж ёсць чалавек, што Ты памятаеш пра яго, або сын чалавечы, што Ты адведваеш яго?

Ня шмат Ты паменшыў яго перад Ангеламі, ды славай і чэсьцяй ахутаў Ты яго,
 
Мала панізіў Ты яго за анёлаў, славаю і пашанаю ўвянчаў яго,

і зрабіў яго гаспадаром над творамі рук Тваіх, і ўсё Ты паклаў пад ногі яму:
 
і паставіў яго над стварэннямі рук Тваіх, і ўсё Ты кінуў пад ногі яго, —

авечак і валоў усіх, дый зьвяр’ё палявое,
 
авечак і быкоў усіх, і ў дадатак звяроў палявых,

птахаў пад нябёсамі й рыбаў у моры — і ўсё, што ходзе сьцежкамі марскімі.
 
птушак нябесных ды рыб марскіх, і ўсё, што ходзіць па шляхах марскіх.

Госпадзе, Валадару наш! Як узьвялічана імя Тваё па ўсенькай зямлі!
 
Госпадзе, Госпад наш, якое ж дзівоснае імя Тваё па ўсёй зямлі!