Псалтыр 95 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Хадзеце, сьпяваць будзем Госпаду, выслаўляці скалу збаўленьня нашага!
 
Прыходзьце, узрадуемся Госпаду; уславім гучна Бога збаўлення нашага.

Станьма прад абліччам Яго ды з падзякай, псальмы сьпявайма Яму!
 
Успрымем загадзя аблічча Яго, у вызнанні і ў псальмах гучна ўславім Яго.

Бо Госпад ёсьць Бог вялікі і Цар вялікі над усімі багамі.
 
Бо вялікі Госпад і вялікі валадар над усімі багамі.

У руцэ ў Яго глыбіні зямныя, і Ягоны-ж вярхі найвышэйшыя гор.
 
Бо ў руцэ Яго глыбіні зямныя і вышыні горныя — у Яго.

Ягонае мора, бо Ён стварыў яго, і сухаземле рукі Яго кшталтавалі.
 
Бо ў Яго — мора, і Ён стварыў яго, і сушу яго рукі сфармавалі.

Хадзеце, суклонімся і ўпадзем, укленчым прад Госпадам, Тварцом нашым!
 
Прыходзьце, паклонімся, і ўкленчым, схілім калені перад Госпадам, Які стварыў нас,

Бо Ён ёсьць Бог наш, а мы — народ, што Ён пасьвіць, авечкі Ягонай рукі. О, каб вы паслухалі сяньня Ягонага голасу:
 
бо Ён ёсць Бог наш, мы ж народ пашы Яго і авечкі рукі Яго. О, каб вам сёння

Ня робце жорсткімі сэрцы вашыя, як у Мэрыбе, як у дзень спакушэньня ў пустыні,
 
паслухаць голас Яго: не закамяняйце сэрцаў вашых,

дзе вашы айцы спакушалі Мяне, прабавалі Мяне, хоць і бачылі рук Маіх дзела!
 
як у Мэрыбе, як у дзень спакушэння ў Масе ў пустыні, дзе спакушалі Мяне бацькі вашы: выпрабоўвалі Мяне, хоць і бачылі справы Мае.

Сорак гадоў гэты род абураў Мяне; дык Я сказаў: яны — народ, што блукаецца сэрцам і не пазналі шляхоў Маіх.
 
Сорак гадоў надакучала Мне гэтае пакаленне, і сказаў Я: «Яны — народ аблудных сэрцам. І яны не пазналі шляхоў Маіх;

Дык Я пакляўся ў гневе Маім, што ня ўвойдуць яны ў мой супакой.
 
дык пакляўся Я ў гневе Маім; не ўвойдуць яны ў супачынак Мой».