Псалтыр 64 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Кіраўніку хору: псальм Давідавы.
 
Кіраўніку хору. Псальм. Давідаў.

Пачуй, о Божа, мой голас у модлах маіх! Ад страху ворага жыцьцё Ты маё захавай!
 
Выслухай, Божа, голас мой у роздуме маім; ад страху непрыяцеля ўсцеражы душу маю.

Схавай Ты мяне ад натоўпу злачынцаў, ад банды беззаконьнікаў,
 
Захавай мяне ад зборышча ліхадзеяў, ад мноства тых, што чыняць несправядлівасць.

што язык свой, як меч, навастрылі, свае стрэлы — калючыя словы — паклалі на лук,
 
Яны востраць, быццам меч, языкі свае, накіравалі стрэлы свае, атрутныя словы,

каб украдкам страляць у бязьвіннага: зьнячэўку страляюць яны ў яго й не баяцца.
 
каб употай працяць стралой беззаганнага. Знянацку стрэляць яны ў яго і не пабаяцца.

Ад замыслу ліхога яны не адступяцца; і змаўляюцца тайна сеці наставіці; яны думаюць: хто будзе бачыць?
 
Умацавалі яны ў сабе нягодны намер. Змовіліся яны, каб патаемна наставіць сеці, сказалі: «Хто ўбачыць іх?»

Злачынствы надумваюць: Гатовы мы! Замах прыдуманы! Нутро-ж кожнага й сэрца яго — непрагледны.
 
Выдумляюць яны злачынствы, ажыццяўляюць прыдуманыя намеры. Унутранае чалавека і сэрца яго — бездань.

А тады іх Бог паражае: стралою зьнячэўку паранены яны,
 
І Бог паб’е іх стрэламі; знянацку з’явяцца раны Яго.

языком сваім самі павытнуць сябе. І дрыжаць усе, хто на іх пазірае.
 
І зрабіў Ён бяссільнымі языкі іх. Адвернуць галовы ўсе, хто ўбачыць іх.

І людзі ўбаяцца. раскажуць пра Божыя дзеі і сьцемяць, што гэта Ягоная справа.
 
І кожны чалавек будзе баяцца; і будуць абвяшчаць справы Божыя і будуць асэнсоўваць учынкі Яго.

Пабожны усьцешыцца ў Госпадзе і будзе шукаці прыпынку ў Яго, і шчырыя сэрцам усе будуць хваліцца.
 
Узвесяліцца справядлівы ў Госпадзе і будзе мець у Ім надзею, і ўслаўлены будуць усе праўдзівыя сэрцам.