Псалтыр 80 псалом
Псалтыр
Пераклад Л. Дзекуць-Малея → Пераклад Чарняўскага 2017
Кіраўніку хору: на лад: Лілеі. Псальм Асапавы.
Кіраўніку хору. Паводле «Лілея навучання». Асафа. Псальм.
Пастыру Ізраіля! Пачуй! Ты, што, як авечак, водзіш Язэпа, што над Хэрубінамі сядаеш, зьяві Сябе!
Ты, што пасвіш Ізраэля, зважай! Ты, што вядзеш, бы авечку, род Язэпа; Ты, што сядзіш на херубіне,
Перад Яхрэмам і Бэніямінам і перад Манассай узьнімі Ты сілу Сваю і выйдзі нам на ўспамогу!
заззяй перад Эфраімам, Бэньямінам, Манасам. Узруш сілу Тваю і прыйдзі, каб збавіць нас.
Божа, вярні нас назаді Няхай аблічча Тваё нам зазьяе, і спасемся!
Божа, навярні нас, прасвятлі аблічча Тваё, і мы будзем збаўлены.
Госпадзе, Божа нябесных сілаў, дакуль будзеш Ты ў гневе пры малітве народу Твайго?
Госпадзе Божа магуццяў, як доўга будзеш гневацца на малітву народа Твайго?
Ты іх хлебам сьлёзным карміу і шчодра сьлязамі паіў іх.
Накарміў Ты нас хлебам слёз і напаіў нас багата слязамі.
Ты зрабіў з нас прадмет барацьбы дзеля нашых суседзяў, і ворагі нашы зьдзекі строяць над намі.
Зрабіў Ты нас прадметам спрэчак суседзяў нашых, і ворагі нашыя кпілі з нас.
Божа сілаў! Адбудуй Ты нас! Зазьяй абліччам Тваім, і спасемся!
Божа магуццяў, навярні нас, прасвятлі аблічча Тваё, і мы будзем збаўлены.
Ты куст вінаградны вынес з Эгіпту, выгнаў народы й яго пасадзіў.
Перанёс Ты вінаград з Егіпта, выгнаў паганаў, а яго пасадзіў.
Ты расчысьціў месца яму, і ён укараніўся ды напоўніў зямлю.
Ты ачысціў для яго месца, укараніў яго і ён напоўніў зямлю.
Горы пакрыліся ценем ягоным, а вецьце яго, як кедры Божыя.
Пакрыліся горы ценем яго, а галінамі яго — кедры Божыя.
Ён галіны свае пусьціў аж да мора, а парасткі сваі да ракі.
Працягнуў ён парасткі свае аж да мора, і аж да ракі — атожылкі свае.
Чаму Ты раскінуў агарожу ягоную, і кожын, хто міма праходзе, абрывае яго?
Чаму ж разбурыў Ты агароджу яго, і абіраюць яго ўсе, што міма ідуць дарогай?
Вяпрук лясны падкапывае яго, і зьвер палявы аб’ядае яго.
Падкапаў яго дзік з лесу, і адзінокі звер пааб’ядаў яго.
Божа сілаў! Павярніся, зірні з неба, паглядзі й адведай вінаграднік гэты!
Божа магуццяў, навярніся, глянь з неба і пабач, і наведай гэты вінаграднік.
Захавай тое, што правіца Твая пасадзіла, ды парасьці, што Ты для Сябе ўзмацаваў.
І заапякуйся тым, што насадзіла Твая правіца, і над сынам чалавечым, якога Ты ўмацаваў для Сябе.
Ён агнём апалены ды пасечаны і гіне ад гневу аблічча Твайго.
Яго спалілі агнём і перакапалі; ад вымовы Тваёй яны загінуць.
Хай рука Твая будзе над мужам правіцы Тваёй, над сынам чалавечым, якога Ты ўмацаваў для Сябе!
Хай будзе рука Твая над чалавекам правіцы Тваёй, над сынам чалавечым, якога Ты ўмацаваў для Сябе.
Мы-ж ад Цябе не адступімся; ажыві нас, і мы будзем імя Тваё прызываці.
Ужо больш не адступімся ад Цябе, Ты ажывіш нас, і імю Твайму будзем усклікаць.
Госпадзе, Божа сілаў нябесных! Вярні нас назад! Няхай зазьяе аблічча Тваё, і спасемся!
Госпадзе, Божа магуццяў, навярні нас і акажы нам спагаднасць, і будзем збаўлены.