Псалтыр 25 псалом
Псалтыр
Пераклад Л. Дзекуць-Малея → Пераклад Чарняўскага 2017
Псальм Давідавы. Да Цябе, Госпадзе, узьнімаю я душу маю.
АЛЕФ. Давідаў. Да Цябе, Госпадзе, узняў я душу маю.
Божа мой! На Цябе спадзяюся; ня дай жа мяне асароміць, ня дай ворагам маім быць нада мной пераможцамі.
БЭТ. Божа мой, на Цябе спадзяюся; хай не сумеюся! Хай не кпяць з мяне непрыяцелі мае.
Бо-ж ніколі ня будуць асаромлены ўсе, што на Цябе спадзяюцца; асаромлены будуць тыя, што адступаюцца без дай прычыны.
ГІМЭЛЬ. Бо ўсе тыя, што трымаюцца Цябе, не будуць засаромлены. Засаромлены будуць тыя, што чыняць бязвер’е дзеля марнасці.
Госпадзе, пакажы мне шляхі Тваі, навучы, дзе сьцежкі Твае.
ДАЛЕТ. Пакажы мне, Госпадзе, Свае дарогі і навучы мяне Сваім сцежкам.
Дай мне хадзіці ў праўдзе Тваёй і навучы; бо Ты ёсьць Бог, Які мяне ўспамагае: на Цябе спадзяюся заўсёды.
ГЭ. Вядзі мяне праўдай Тваёй і вучы мяне, бо Ты Бог збавення майго. ВАЎ. На Цябе спадзяюся штодня.
Прыпомні аб міласэрнасьці Тваёй, Госпадзе, ды аб ласках Тваіх, бо яны ад вякоў.
ДЗАЙН. Помні, Госпадзе, пра міласці Твае і пра міласэрнасць Тваю, бо яны спрадвечныя!
Аб грахох моладасьці маёй ды аб праступках маіх не ўспамінай: успомні аба мне паводле ласкавасьці Тваёй, паводле дабраты Тваёй, Госпадзе!
ГЭТ. Не прыпамінай грахоў маладосці маёй і злачынстваў маіх, але помні пра мяне Ты паводле міласэрнасці Тваёй, згодна дабраце Тваёй, Госпадзе.
Госпад добры й справядлівы, дык паказуе дарогу грэшнікам.
ТЭТ. Спагадны і праведны Госпад, таму наставіць грэшнікаў на шлях;
Ён вядзе пакорных да праўды і ўбогім сьцежкі Свае паказуе.
ЁД. пакорлівых накіруе па справядлівасці, наставіць сціплых на шляхі іх.
Усе шляхі Гасподнія — ласка ды праўда для тых, што заховываюць запаведзь Яго і аб’явы Ягоныя.
КАФ. Усе шляхі Божыя — міласэрнасць і праўда для тых, што трымаюцца запавету Яго і сведчанняў Яго.
Дзеля іменьня Твайго, Госпадзе, даруй мне віну маю, бо-ж надта яна вялікая!
ЛЯМЭД. Дзеля імя Твайго, Госпадзе, злітуешся над грахом маім: бо ён так вялікі.
Хто ёсьць чалавек, што Госпада баіцца? Яму Ён пакажа дарогу, якую выбраць яму.
МЭМ. Хто той чалавек, які шануе Госпада? Ён наставіць такога на шлях, які [той] выбірае.
Душа яго бытаваціме ў шчасьці, а насеньне ягонае зямлю ў спадчыну дастане.
НУН. Душа яго ў дабротах прабудзе, а семя яго ўспадкаеміць зямлю.
Тайна Госпада выяўляецца тым, што баяцца Яго, і запаведзь Сваю ім Ён абвяшчае.
САМЭК. Спагадае Госпад тым, што баяцца Яго, каб адкрыць ім Свой запавет.
Вочы мае заўсёды на Госпада ўзіраюцца, бо Ён выцягне з сеці ногі мае.
АЙН. Мае вочы заўсёды да Бога, бо Ён вырве ногі мае з пасткі.
Зірні на мяне і зьлітуйся нада мною, бо адзінокі я й уцісьнёны.
ФЭ. Глянь на мяне і пашкадуй мяне, бо самотны я і няшчасны.
Тузе сэрца майго дай прастору і вывядзі мяне з бедаў маіх!
САДЭ. Пашыр цясніны сэрца майго і вырві мяне з засмучэнняў маіх.
Глянь на мукі мае і нядолю маю і даруй мне ўсе грахі мае!
Прыглядзіся да пакорлівасці маёй і да цяжару працы маёй і адпусці ўсе правіны мае.
Глянь на ворагаў маіх, як многа іх, ды як мяне ненавідзяць яны несправядліва!
РЭС. Глянь на ворагаў маіх, бо яны размножыліся, і лютай нянавісцю зненавідзелі мяне.
Захавай душу май і спасі мяне, каб ня быў я асаромлены, бо ў Цябе я шукаю прыпынку.
СІН. Пільнуй душу маю і вырві мяне; не пасаромлюся, бо я ўсклаў надзею на Цябе.
Няхай захаваюць мяне нявіннасьць і справядлівасьць, бо на Цябе спадзяюся.
ТАЎ. Хай бязвіннасць і справядлівасць пільнуюць мяне, бо я трымаўся Цябе.
О, Божа! Выбаў Ізраіля з усіх бедаў ягоных!
ФЭ. Збаў, Божа, Ізраэль ад усіх няшчасцяў яго.