Псалтыр 75 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Кіраўніку хору: на лад: не выгубляй. Псальм Асапавы.
 
Кіраўніку хору. Паводле «Не знішчай» Псальм. Асафа. Песня.

Хвалім Цябе, Божа, хвалім Цябе, і тыя, што імя Тваё прызываюць, абвяшчаюць цуды Твае.
 
Будзем вызнаваць Цябе, Божа; будзем вызнаваць і прызываць імя Тваё: будзем распавядаць пра цуды Твае.

Калі Я бачу, што час настаў, Я суджу па справядлівасьці.
 
Калі ўстанаўлю час, буду судзіць Я па справядлівасці.

Калі зямля хістаецца і, хто жыве на ёй, гіне, — Я умацоўваю слупы яе. (Зэля)
 
Калі расцяклася зямля і ўсе, што жылі на ёй, Я ўмацаваў апоры яе.

Да гордых кажу Я: не надымайцеся! да бязбожных: не падыймайце ўверх рогу!
 
Я сказаў тым, што выхваляюцца: «Не выхваляйцеся!» і тым, што ўчыняюць злачынствы: «Не ўздымайце рог!

Не падыймайце высака рогу, не кажэце дзёрзка супраць Скалы!
 
Не ўздымайце дагары рог ваш; не прамаўляйце нахабстваў супраць Бога».

Бо не з усходу, ні з захаду, ні з пустыні вывышшэньне,
 
Бо пыха — ані з усходу, ані з захаду, ані з пустыні.

але Бог есьць Судзьдзя: гэтага Ён паніжае, таго-ж вывышшае.
 
Бо Бог — суддзя: аднаго прынізіць, а другога ўзвялічыць.

Бо мае ў руцэ Госпад чару з віном, якое ў ёй пеніцца; яна поўна напою зьмяшанага, і Ён із яе налівае. Ды толькі фуз яго піць будуць бязбожнікі ўсе на зямлі.
 
Бо ў руцэ Госпада — келіх чыстага віна, поўны сумесі. І Ён пераліў з аднаго ў другое; і ўсё ж будуць выпіваць аж да асадку, будуць піць усе грэшнікі зямлі.

Я-ж весяліціся буду навекі, буду славіць Бога Якубавага.
 
А я буду абвяшчаць у вяках, буду спяваць Богу Якубаву.

І адсяку Я ўсе рогі бязбожнікам, рогі-ж пабожных высака узьнясуцца.
 
І патрушчу я ўсе рогі грэшнікаў; і ўзвысяцца рогі справядлівага.