Псалтыр 65 псалом
Псалтыр
Пераклад Л. Дзекуць-Малея → Пераклад Чарняўскага 2017
Кіраўніку хору: псальм Давідавы. Дзеля пяяньня.
Кіраўніку хору. Псальм Давідаў. Песня.
На Цябе надзея, Табе, о Божа, хвала на Сыоне; няхай споўнены будуць Табе абяцаньні.
Божа, Ты варты гімна на Сіёне; і перад Табой хай споўніцца абяцанне ў Ерузаліме.
Ты, што чуеш малітву, — да Цябе ўсё жывое імкнецца.
Ты выслухоўваеш малітвы; да Цябе прыходзіць кожнае цела з-за грахоў,
Віны мае перамаглі мяне; але Ты пакрываеш праступкі нашы.
і нават пры цяжары бязвер’я нашага Ты спагадаеш нам.
Шчасьце таму, каго выбраў Ты і прыблізіў, каб жыў ён у сенях Тваіх; насычаціся будзем дабром Твайго дому, сьвятога храму Твайго.
Шчасны той, каго Ты абярэш і прымеш; будзе жыць ён у палацах Тваіх. Мы напоўнімся дабротамі дому Твайго, святасцю святыні Тваёй.
Страшнымі ўчынкамі даеш нам адказ паводле Тваёй справядлівасьці, Божа, — Ты, што ёсьць наша спасеньне, усіх канцоў сьвету й далёкага мора надзея!
Дзівосным чынам у справядлівасці Ты пачуеш нас, Божа збаўлення нашага, надзея ўсіх канцоў зямлі і далёкага мора.
Што ўгрунтаваў Сваёй сілаю горы і моцаю падперазаўся.
Ты — што ўмацоўваеш горы магуццем Тваім, апярэзаны сілаю.
Што ўсьцішаеш шум мора, шум хваляў ягоных і хваляваньне народаў.
Ты — што глушыш шум мора, шум хваль яго і бунт народаў.
Дык жыхары канцоў сьвету далёкіх баяцца знаменьняў Тваіх: землі на ўсходзе й на захадзе Ты славіць Цябе пабуджаеш.
І будуць баяцца тыя, што насяляюць межы зямлі, знакаў Тваіх; ускрайкі ўсходу і захаду Ты пацешыш.
Ты адведаў зямлю й напаіў яе; Ты яе ўзбагачаеш мнагаводным Божым патокам. Ты прыгатоўваеш хлеб для яе, бо гэтак спасобіш зямлю.
Наведаў Ты зямлю і навадніў яе, узбагаціў Ты яе разнастайна. Ручай Бога поўны водамі; уладкаваў Ты хлеб іх, бо так уладкаваў Ты яе.
Ты навадняеш разоры яе і скібы яе разрыхляеш, дажджовымі кроплямі яе разьмякчаеш, багаславіш яе ўраджаі.
Ты — што барозны яе вадою поіш, Ты — што глебу яе раўняеш; Ты змягчаеш яе дажджамі, дабраслаўляеш яе пладамі.
Ты год завяршаеш дабратою Тваёй, і тукам сьцежкі Твае аплываюць.
Ты ўвянчаў год дабром Тваім, і сляды Твае будуць струменіцца тлушчам.
Парастаюць буйна пожні і стэпы, і ўзгоркі радасьцяй падпяразваюцца.
Будуць струменіцца пустынныя выганы, і ўзгоркі апяражуцца радасцю.
Пасьвішчы стадамі авец апранаюцца, і даліны атулены жытам: і радасна міжы сабой гукаюць, і песьні пяюць.
Лугі апрануліся ў авечак, і лагчыны напоўняцца хлебам; будуць усклікаць яны і гімн [Табе] заспяваюць.