Псалтыр 65 псалом

Псалтыр
Пераклад Антонія Бокуна → Пераклад Чарняўскага 2017

 
 

Кіраўніку хору. Псальм Давіда. Сьпеў.
 
Кіраўніку хору. Псальм Давідаў. Песня.

Табе, Божа, прыналежыць хвала на Сыёне; і Табе будуць споўненыя абяцаньні.
 
Божа, Ты варты гімна на Сіёне; і перад Табой хай споўніцца абяцанне ў Ерузаліме.

Ты чуеш малітву, да Цябе ўсякае цела імкнецца.
 
Ты выслухоўваеш малітвы; да Цябе прыходзіць кожнае цела з-за грахоў,

Справы беззаконныя перамаглі мяне, але Ты дараваў нам правіны нашыя.
 
і нават пры цяжары бязвер’я нашага Ты спагадаеш нам.

Шчасьлівы той, каго Ты выбраў і наблізіў, каб жыў ён на панадворках Тваіх; мы будзем насычацца даброцьцем Дому Твайго, сьвятой сьвятыні Тваёй.
 
Шчасны той, каго Ты абярэш і прымеш; будзе жыць ён у палацах Тваіх. Мы напоўнімся дабротамі дому Твайго, святасцю святыні Тваёй.

Страшнымі [ўчынкамі] ў праведнасьці Ты адказваеш нам, Божа збаўленьня нашага, пэўнасьць усіх канцоў зямлі і далёкага мора,
 
Дзівосным чынам у справядлівасці Ты пачуеш нас, Божа збаўлення нашага, надзея ўсіх канцоў зямлі і далёкага мора.

Які ўгрунтаваў горы сілаю Сваёй, Які падперазаны магутнасьцю,
 
Ты — што ўмацоўваеш горы магуццем Тваім, апярэзаны сілаю.

Які суцішае шум мора, шум хваляў ягоных і мноства народу.
 
Ты — што глушыш шум мора, шум хваль яго і бунт народаў.

І будуць баяцца знакаў Тваіх жыхары канцоў сьвету, землі на ўсходзе і на захадзе Ты разьвесяляеш.
 
І будуць баяцца тыя, што насяляюць межы зямлі, знакаў Тваіх; ускрайкі ўсходу і захаду Ты пацешыш.

Ты наведаў зямлю і напаіў яе, Ты ўзбагаціў яе Божым струмянём, напоўненым водамі. Ты прыгатаваў збожжа на ёй, бо гэтак угрунтаваў яе.
 
Наведаў Ты зямлю і навадніў яе, узбагаціў Ты яе разнастайна. Ручай Бога поўны водамі; уладкаваў Ты хлеб іх, бо так уладкаваў Ты яе.

Ты насычаеш разоры яе і разраўноўваеш скібы яе, кроплямі дажджу разьмякчаеш яе, парастак яе дабраслаўляеш.
 
Ты — што барозны яе вадою поіш, Ты — што глебу яе раўняеш; Ты змягчаеш яе дажджамі, дабраслаўляеш яе пладамі.

Ты ўкаранаваў год дабром Тваім, і сьцежкі Твае разьліваюць тлустасьць,
 
Ты ўвянчаў год дабром Тваім, і сляды Твае будуць струменіцца тлушчам.

разьліваюць на пашы ў пустыні, і ўзгоркі падпярэзваюцца радасьцю,
 
Будуць струменіцца пустынныя выганы, і ўзгоркі апяражуцца радасцю.

апранаюцца ў чароды авечак, і даліны атуляюцца збожжам, радасна гукаюць і сьпяваюць.
 
Лугі апрануліся ў авечак, і лагчыны напоўняцца хлебам; будуць усклікаць яны і гімн [Табе] заспяваюць.