Псалтыр 98 псалом

Псалтыр
Пераклад Антонія Бокуна → Пераклад Чарняўскага 2017

 
 

Псальм. Сьпявайце ГОСПАДУ новы сьпеў, бо Ён цуды ўчыніў! Правіца Ягоная і рамяно сьвятасьці Ягонай здабылі перамогу Яму.
 
Псальм. Спявайце Госпаду новую песню, бо ўчыніў Ён цуды. Паратунак у правіцы Яго і ў руцэ святой Яго.

ГОСПАД зьявіў збаўленьне Сваё, перад вачыма народаў адкрыў праведнасьць Сваю.
 
Госпад абвясціў Сваё збаўленне, на віду паганаў аб’явіў Ён Сваю справядлівасць.

Узгадаў пра міласэрнасьць Сваю і вернасьць Сваю для дому Ізраіля. Усе канцы зямлі ўбачылі збаўленьне Бога нашага.
 
Успомніў Ён пра міласэрнасць Сваю і пра праўду Сваю для дома Ізраэля. Убачаць усе канцы свету збаўленне Бога нашага.

Усклікай ГОСПАДУ, уся зямля! Цешцеся, і радуйцеся, і выслаўляйце!
 
Услаўляй гучна Бога, уся зямля, выбягайце, радуйцеся і грайце псальмы.

Выслаўляйце ГОСПАДА на гусьлях, на гусьлях і галосным сьпяваньнем!
 
Грайце Госпаду на цытры, на цытры і з гукамі псальма.

На трубах і гукам рогу ўсклікайце перад абліччам Валадара ГОСПАДА!
 
На срэбных трубах і пад гукі рога спявайце гучна славу перад абліччам Госпада Валадара.

Няхай мора гудзе і ўсё, што ў ім, сусьвет і ўсё, што жыве ў ім!
 
Хай шуміць мора і ўсё, што яго запаўняе, увесь сусвет і тыя, што ў ім пражываюць.

Няхай пляскаюць у далоні рэкі, і горы радуюцца разам [з імі]
 
Хай рэкі плешчуць у далоні і разам радуюцца горы

перад абліччам ГОСПАДА, бо Ён ідзе судзіць зямлю. Сусьвет Ён будзе судзіць паводле праведнасьці і народы — паводле справядлівасьці.
 
перад Госпадам, бо прыходзіць Ён судзіць зямлю. Ён будзе судзіць сусвет па справядлівасці і народы — па праўдзе.