Псалтыр 92 псалом

Псалтыр
Пераклад Антонія Бокуна → Пераклад Чарняўскага 2017

 
 

Псальм. Сьпеў на дзень суботы.
 
Псальм. Песня. На дзень шабату.

Добра славіць ГОСПАДА і выслаўляць імя Тваё, Найвышэйшы!
 
Як жа добра вызнаваць Госпада і спяваць псальмы імю Твайму, Найвышэйшы!

Апавядаць раніцаю міласэрнасьць Тваю, і вернасьць Тваю — уначы,
 
Раніцай абвяшчаць Тваю міласэрнасць, і праўду Тваю — уначы.

на дзесяціструнным псалтыры і на гусьлях граючы.
 
На дзесяціструнным, і на гуслях, са спевам пад цытру.

Бо Ты ўзьвесяліў мяне, ГОСПАДЗЕ, справамі Тваімі, творам рук Тваіх буду радавацца.
 
Бо пацешыў Ты мяне, Госпадзе, Сваім стварэннем, і я буду радавацца справам рук Тваіх.

Якія вялікія ўчынкі Твае, ГОСПАДЗЕ; вельмі глыбокія думкі Твае.
 
Якія ж велічныя справы Твае, Госпадзе: надзвычай глыбокімі сталіся задумы Твае!

Чалавек бязглузды ня будзе ведаць, і дурань не зразумее гэтага.
 
Неразумны чалавек не спазнае і бязглузды не зразумее гэтага.

Калі бязбожнікі зелянеюць, як трава, і ўсе ліхадзеі квітнеюць, няхай будуць яны зьнішчаны на вякі!
 
Няхай грэшныя разрастуцца, як трава, і будуць квітнець усе тыя, што чыняць несправядлівасць, аднак гэта будзе [ім] на згубу на векі вечныя;

А Ты, ГОСПАДЗЕ, узвышаны на вякі!
 
а Ты, Госпадзе, вечна Найвышэйшы.

Бо вось ворагі Твае, ГОСПАДЗЕ, бо вось ворагі Твае загінуць, і будуць расьцярушаныя ўсе ліхадзеі.
 
Бо вось, непрыяцелі Твае, Госпадзе, бо вось, непрыяцелі Твае загінуць і расцярушацца ўсе, што чыняць несправядлівасць.

І Ты ўзнясеш рог мой, як у аднарога, я буду памазаны сьвежым алеем.
 
Ты ўзвысіш рог мой, як у адзінарога, атрымаў я багатае намашчэнне алейкам.

Будуць глядзець вочы мае на ворагаў маіх, і пра злачынцаў, якія паўсталі супраць мяне, пачуюць вушы мае.
 
Вока маё з пагардаю глядзела на непрыяцеляў маіх, ды пра загубу ліхотнікаў, што паўстаюць на мяне, пра ліхадзеяў радасна слухала вуха маё.

Праведнік быццам пальма зелянее, ён расьце, як той кедр на Лібане.
 
Справядлівы будзе квітнець, як пальма; быццам кедр лібанскі, узрасце.

Насаджаныя ў Доме ГОСПАДА зелянеюць на панадворках Бога нашага.
 
Пасаджаныя ў Госпадавым доме, у дзядзінцы Бога нашага заквітнеюць.

Яны плод свой даюць і ў старасьці, яны сакавітыя і сьвежыя,
 
Будуць прыносіць плады ў старасці, сакавітыя будуць і поўныя свежасці,

каб абвяшчаць, што ГОСПАД справядлівы, Скала мая, і няма ў Ім беззаконьня.
 
Каб вясціць, што Госпад справядлівы, прыстанішча маё, і няма несправядлівасці ў Ім.