Псалтыр 61 псалом

Псалтыр
Пераклад Антонія Бокуна → Пераклад Чарняўскага 2017

 
 

Кіраўніку хору: на струнных інструмэнтах. Давіда.
 
Кіраўніку хору. На струнах. Давідаў.

Пачуй, Божа, галашэньне маё, зваж на малітву маю!
 
Выслухай, Божа, маленне маё, зваж на малітву маю.

Ад краю зямлі да Цябе клічу, калі зьнемагае сэрца маё; на скалу, што ўзвышаецца нада мною, узьвядзі мяне!
 
З канцоў зямлі ўсклікаў я да Цябе, бо трывожыцца сэрца маё. На скалу непрыступную завядзі мяне!

Бо Ты быў прыстанішчам маім, вежай моцы маёй супраць ворага.
 
Бо стаўся Ты надзеяй маёй, моцнай вежай перад непрыяцелем.

Буду жыць у намёце Тваім вечна, маю надзею пад заслонаю крылаў Тваіх. (Сэлях)
 
Буду жыць я вечна ў палатцы Тваёй, схаваюся пад покрывам крылаў Тваіх,

Бо Ты, Божа, чуў абяцаньні мае, Ты даў валоданьне тым, што баяцца імя Твайго.
 
бо ты, Божа мой, выслухаў абяцанні мае, даў спадчыну тым, што шануюць імя Тваё.

Дадай дні да дзён валадара, няхай гады яго [будуць] з пакаленьня ў пакаленьне,
 
Ты дадасі дні да днёў цара, гады ж яго — праз пакаленні і пакаленні.

Няхай жыве вечна перад абліччам Божым; прызнач міласэрнасьць і праўду, каб захоўвалі яго!
 
Хай сядзіць ён вечна перад Богам; міласэрнасць і ласка хай захоўваюць яго.

Дык буду выслаўляць імя Тваё на вякі, буду спаўняць абяцаньні мае кожны дзень.
 
Так буду я спяваць псальмы імю Твайму на векі вечныя, каб спаўняць мне абяцанні мае ад дня да дня.