Псалтыр 3 псалом

Псалтыр
Пераклад Антонія Бокуна → Пераклад Чарняўскага 2017

 
 

Псальм Давіда, калі ён уцякаў ад аблічча Абсалома, сына свайго.
 
Псальм Давідаў, калі ўцякаў ад свайго сына Абсалома.

ГОСПАДЗЕ, як шматлікія сталі прыгнятальнікі мае! Шмат іх паўстае супраць мяне!
 
Божа, як жа многа тых, што непакояць мяне, як шмат бунтуюцца супраць мяне!

Шмат тых, якія кажуць пра душу маю: «Няма для яго збаўленьня ў Бога». (Сэлях)
 
Многія вось кажуць душы маёй: «Няма яму збаўлення ў Богу».

Але Ты, ГОСПАДЗЕ, — шчыт для мяне, Ты — слава мая, і Ты падымаеш галаву маю.
 
Ты ж, Госпадзе, Божа, шчыт мой, хвала мая Ты, галаву падымаеш мне ўверх.

Голасам маім я клікаў да ГОСПАДА, і Ён адказаў мне з гары Сваёй сьвятой. (Сэлях)
 
Клічам сваім прызываў я Госпада. І выслухаў Ён мяне з гары Сваёй святой.

Я лёг і заснуў, і абудзіўся, бо ГОСПАД падтрымлівае мяне.
 
Я лёг і выспаўся, устаў, бо Госпад ахоўвае мяне.

Не палохаюся я многіх тысячаў народу, што абступілі мяне наўкола.
 
Не збаюся і тысячы людзей, што навокал мяне абступілі.

Паўстань, ГОСПАДЗЕ! Збаў мяне, Божа мой! Бо Ты даў ворагам маім па сківіцах, Ты скрышыў зубы бязбожнікаў.
 
Узніміся, Госпадзе! Ухавай мяне, Божа мой! Бо па шчацэ даў Ты ўсім супраціўнікам маім, павыбіваў Ты зубы грэшнікам.

У ГОСПАДА збаўленьне і для народу Твайго дабраслаўленьне Тваё. (Сэлях)
 
У Бога бо збаўленне, і дабраславенне Тваё Твайму народу!