Псалтыр 63 псалом

Псалтыр
Пераклад Антонія Бокуна → Пераклад Чарняўскага 2017

 
 

Псальм Давіда, калі ён быў у пустыні Юдэйскай.
 
Псальм Давідаў. Калі быў ён у пустыні Юдэйскай.

Божа! Ты — Бог мой! Цябе я шукаю, Цябе прагне душа мая, па Табе тужыць цела маё ў сухой і спрагнёнай зямлі, на бязводзьдзі.
 
Божа, Ты — мой Бог, перад Табою я чуваю ад світання. Сасмягла па Табе душа мая, Цябе запатрабавала цела маё ў зямлі пустыннай, ссохлай і бязводнай.

Гэтак я ўглядаўся на Цябе ў сьвятасьці Тваёй, каб убачыць моц Тваю і славу Тваю.
 
У святыні адкрыў я Цябе, каб убачыць магуцце Тваё і славу Тваю.

Бо міласэрнасьць Твая лепшая за жыцьцё; вусны мае хваліць Цябе будуць.
 
Бо міласэрнасць Твая лепшая за жыццё. Вусны мае будуць хваліць Цябе.

Гэтак буду я дабраслаўляць Цябе ў жыцьці маім, у імя Тваё буду рукі мае ўзьнімаць.
 
У жыцці маім дабраслаўляю Цябе, у імя Тваё падымаю я рукі мае.

Быццам тлушчам і тлустасьцю насычаецца душа мая, і сьпевам хвалы будуць хваліць Цябе вусны мае,
 
Быццам тукам і маслам алівы, насыціцца душа мая, і голасам радасці хваліць будуць вусны мае.

калі я на ложку маім пра Цябе ўспамінаю, калі ў часе варты [начной] пра Цябе разважаю.
 
Буду помніць я Цябе на пасцелі маёй, і на золку буду разважаць пра Цябе.

Бо Ты быў успамогай мне, і ў ценю крылаў Тваіх буду весяліцца.
 
бо Ты — Успаможца мой, і пад покрывам крылаў Тваіх я радуюся.

Прыляпілася да Цябе душа мая, падтрымлівае мяне правіца Твая.
 
Прытулілася да Цябе душа мая, правіца Твая падтрымлівае мяне.

А тыя, што шукаюць загубы душы маёй, пойдуць у глыбіні зямлі,
 
А тыя, што будуць шукаць пагібелі для душы маёй, сыдуць у апраметныя зямлі,

будуць аддадзены яны ў рукі мяча, стануцца здабычай шакалаў.
 
хай загінуць яны ад мяча, пажывай лісаў будуць.

І валадар узрадуецца ў Богу; і будзе хваліцца кожны, хто Ім прысягае, бо будуць заткнёныя вусны таго, хто гаворыць хлусьню.
 
А цар узвесяліцца ў Богу; праслаўлены будуць усе, хто прысягнуў Яму, бо закрыліся вусны тых, хто прамаўляе несправядліва.