Псалтыр 128 псалом

Псалтыр
Пераклад Антонія Бокуна → Пераклад Чарняўскага 2017

 
 

Сьпеў узыходжаньня. Шчасьлівы кожны, хто баіцца ГОСПАДА, хто ходзіць шляхамі Ягонымі.
 
Песня ўзыходжання. Шчасны кожны, хто шануе Госпада, хто ходзіць па Яго дарогах.

Ты будзеш працу рук тваіх есьці, ты шчасьлівы, і добра табе!
 
Бо з працы рук тваіх будзеш харчавацца, шчасны будзеш і добра будзе табе.

Жонка твая ў доме тваім будзе плодная, быццам лаза вінаградная; сыны твае — як галіны аліўкавыя, наўкола стала твайго.
 
Жонка твая, як плодная галінка вінаграду ў пакоях дому твайго; сыны твае, як парасткі аліўныя вакол твайго стала.

Вось, гэтак будзе дабраслаўлёны чалавек, які баіцца ГОСПАДА.
 
Вось, так дабраславёны будзе чалавек, які шануе Госпада.

І дабраславіць цябе ГОСПАД з Сыёну, і ты будзеш бачыць дабрабыт Ерусаліму ў-ва ўсе дні жыцьця твайго,
 
Хай дабраслаўляе цябе Госпад з Сіёна, а ты глядзі на даброты Ерузаліма ва ўсе дні жыцця твайго,

і будзеш бачыць сыноў ад сыноў тваіх. Супакой над Ізраілем!
 
і глядзі на сыноў тваіх сыноў. Супакой над Ізраэлем!