Псалтыр 51 псалом
Псалтыр
Пераклад Антонія Бокуна → Пераклад Чарняўскага 2017
Кіраўніку хору. Псальм Давіда,
Кіраўніку хору. Псальм. Давідаў.
калі прарок Натан прыйшоў да яго пасьля таго, як ён увайшоў да Батшэвы.
Калі прыбыў да яго прарок Натан, пасля таго як учыніў ён грэх з Бэтсэбай.
Зьлітуйся нада мною, Божа, паводле міласэрнасьці Тваёй, і праз вялікую літасьць Тваю даруй правіны мае!
Злітуйся нада мною, Божа, паводле міласэрнасці Тваёй; і паводле мноства літасцівасці Тваёй зруйнуй правіннасць маю.
Абмый мяне ўсяго ад беззаконьня майго і ачысьці мяне ад грэху майго.
Яшчэ больш абмый мяне ад правіннасці маёй і ад граху майго ачысці мяне.
Бо я ведаю правіну маю, і грэх мой перада мною заўсёды.
Бо я прызнаю правіннасць маю, і грэх мой заўсёды перада мною.
Супраць Цябе, толькі супраць Цябе саграшыў я і ліхое ўчыніў перад вачыма Тваімі, бо Ты праведны ў словах Тваіх і чысты ў судзе Тваім.
Перад Табой, перад Табой адзіным зграшыў я і тое, што ліхім ёсць перад Табою, дапусціў я. Ты справядлівы у прысудзе Тваім і пераможаш на судзе Тваім.
Вось, я ў беззаконьні нарадзіўся, і ў грэху зачала мяне маці мая.
Вось жа нарадзіўся я ў правіннасці, і ў граху пачала мяне маці мая.
Вось, Табе даспадобы праўда ў нутры, дык дай мне пазнаць мудрасьць у сэрцы маім.
Вось жа палюбіў Ты праўду ў сэрцы і патаемна адкрыў Ты мне мудрасць.
Акрапі мяне ізопам, каб я ачысьціўся; абмый мяне, каб я стаўся бялейшым за сьнег.
Пакрапі мяне гізопам — і стану чыстым, памый мяне — і стану бялейшы за снег.
Дай мне пачуць радасьць і вясёласьць, каб узьвесяліліся косткі, якія Ты скрышыў.
Дай мне пачуць пацеху і весялосць, і ўзрадуюцца косці, якія Ты паламаў.
Адвярні аблічча Тваё ад грахоў маіх і прабач мне ўсе беззаконьні мае.
Адвярні аблічча Тваё ад грахоў маіх, і зруйнуй усе мае правіннасці.
Сэрца чыстае ствары ў-ва мне, Божа, і дух упэўнены аднаві ў-ва мне.
Сэрца чыстае ствары ўва мне, Божа, і моцны дух аднаві ва ўлонні маім.
Не адкінь Ты мяне ад аблічча Твайго і Духа Сьвятога Твайго не забірай у мяне!
Не адганяй мяне ад Твайго аблічча і Духа Святога Твайго не адбірай у мяне.
Вярні мне радасьць збаўленьня Твайго, і духам шляхетным падтрымай мяне,
Вярні мне пацеху збаўлення Твайго і самым руплівым духам узмацуй мяне.
і я буду навучаць адступнікаў шляхам Тваім, і грэшнікі вернуцца да Цябе.
Буду вучыць я збачэнцаў з Тваіх дарог, і тады бязбожнікі вернуцца да Цябе.
Вызваль мяне ад [віны] за кроў, Божа, Бог выратаваньня майго, і язык мой будзе крычаць пра праведнасьць Тваю.
Вызваль мяне ад [віны пралітай] крыві, Божа, Божа збаўлення майго. Хай славіць радасна язык мой справядлівасць Тваю.
Адчыні, Госпадзе, вусны мае, і вусны мае будуць абвяшчаць хвалу Тваю.
Госпадзе, адчыні вусны мае, і вусны мае стануць апавяшчаць Тваю хвалу.
Бо Ты не жадаеш ахвяраў, хоць бы я іх даў, і цэласпаленьні не даспадобы Табе.
Але ж не пацяшае Цябе ахвяра, цэласпаленне, калі прынясу яго, Табе не спадабаецца.
Ахвяра для Бога — скрышаны дух; сэрцам скрышаным і зламаным Ты, Божа, не пагарджаеш!
Ахвяра Богу — дух спакутаваны; сэрца стурбаванага і пакорлівага, Божа, Ты не адцураешся.
Рабі добрае Сыёну паводле ласкі Тваёй, збудуй муры Ерусаліму.
Будзь спагадлівым, Госпадзе, у Сваёй добразычлівасці да Сіёна, каб збудаваліся муры Ерузаліма.
Тады будуць Табе даспадобы ахвяры праведнасьці, цэласпаленьні і ахвяры дасканалыя; тады быкоў узьнясуць на ахвярнік Твой.
Тады прымеш Ты ахвяру справядлівасці, прынашэнні і цэласпаленні; тады буду складаць на ахвяру Табе цялят.