Псалтыр 76 псалом
Псалтыр
Пераклад Антонія Бокуна → Пераклад Чарняўскага 2017
Кіраўніку хору: на струнных інструмэнтах. Псальм Асафа. Сьпеў.
Кіраўніку хору. На струнах. Псальм. Асафа. Песня.
Вядомы ў Юдэі Бог, вялікае ў Ізраілі імя Ягонае.
Вядомы ў Юдэі Бог, у Ізраэлі вялікае імя Яго.
І паўстаў у Салеме схоў Ягоны, і жытло Ягонае — на Сыёне.
І ёсць у Салеме хорам Яго, і паселішча Яго ў Сіёне.
Там Ён скрышыў стрэлы луку, шчыт і меч, і вайну. (Сэлях)
Там знішчыў Ён прывабнасць лука, шчыт, меч і вайну.
Ты зьзяеш, Ты слаўнейшы за горы здабычы.
Ты Дзівосны, што нясеш святло ад гор крадзяжу.
Зрабаваныя моцныя сэрцам, дрэмлюць сном сваім, і не знайшлі ўсе мужы дужыя рук сваіх.
Абрабаваныя магутныя сэрцам, паснулі яны сваім сном, і не знайшлі ўсе моцныя мужы рук сваіх.
Ад пагрозаў Тваіх, Божа Якуба, здрантвелі і калясьніца, і конь.
Ад папрокаў Тваіх, Божа Якуба, пазаміралі вознік і конь.
Ты, [толькі] Ты [напаўняеш] страхам, і хто можа ўстаяць перад абліччам Тваім у час гневу Твайго?
Ты — пагрозлівы, і хто супрацівіцца Табе? З таго часу і гнеў Твой.
З неба Ты даеш пачуць прысуд, зямля ў страху і маўчаньні,
З неба дазволіў Ты пачуць прысуд; зямля здрыганулася і суцішылася,
калі Бог падняўся на суд, каб збавіць усіх уцісканых на зямлі. (Сэлях)
калі ўзняўся Бог на суд, каб збавіць усіх пакорлівых на зямлі.
Бо [нават] ярасьць чалавека будзе славіць Цябе, парэшткамі ярасьці Ты падпярэжашся.
Бо гнеў чалавека будзе вызнаваць Цябе, і рэшткі гневу ўчыняць для Цябе дзень святочны.
Давайце і спаўняйце абяцаньні ГОСПАДУ, Богу вашаму; усе, што навакол Яго, нясіце дары Страшліваму.
Прыносьце прысягі і выконвайце [іх] перад Госпадам Богам вашым; усе навокал Яго хай прыносяць дарункі Найвялебнаму.
Ён пазбаўляе духу князёў, Ён страшны для валадароў зямных.
Таму, Які адымае дух князёў, Найвялебнаму сярод цароў зямных.
